＜老公住院節紀念日＞

已差不多一個月沒有UPDATE了，真的不好意思，這一個月有很多事發生了，所以也沒有精神時間更新，實在抱歉。　

11月16日＜老公住院節紀念日＞，當日原本是希望有一系列的紀念活動，事實上我們亦一早為這日請了假打算好好紀念一下。

當日我們本打算到郊外欣賞下大自然的美景，再吃罐頭餐，紀念老公住院的日子。可惜當日到達郊野公園不久，我就唔舒服了，所以要立即折返回家。結果當日我們的活動就是留家休息。罐頭至今仍放在家中未動。

那天之後，我跟老公的公司均到了Audit 的日子，故我倆都分別忙於處理工作上的事務，盡責的老公就連原定的返2天放1天假的安排也放棄了，一星期返足5天，甚至OT，每天回家，我們也累得要命呢！

期間我的胃又不生性，晚晚到了半夜就隱隱作痛，攪到我成日半夜痛醒仲騷擾埋老公休息，有一晚老公更要陪我去急症室，攪了一晚，半夜才回家休息。呢D都加重了老公的身體負荷，好彩佢仍然撐得住。

現在老公audit 已暫告一段落，我的胃又已經冇事了，老公可以過回比較正常的生活了。

近日老公覺得右腹唔係好妥，去左照超聲波，結果發現膽內有好幾粒8mm既膽石，家庭醫生話可能要做手術，但也留待瑪麗就老公的情況看看點安排，12月8日老公會覆診，到時問下醫生，是次仲會抽骨髓，再次看看骨髓的情況。希望沒有壞細胞喇！

Day +349 一切安好^^

上星期四老公覆診，感謝天父，一切仍然穩定，進一步減藥，醫生說如果情況穩定，希望半年至九個月之後可以唔洗食藥。下一次覆診會再抽骨朋髓，看看骨髓情況。

轉眼間老公已上班差不多一個月了，間中也聽到他說攰，但是係正常的疲倦不是無電。

一切就像回到剛結婚的日子，我忙著返學實習，老公自己返工，放工去奶奶度食飯。以前常常掛在口邊的：＂老公，有冇唔舒服呀？＂，依家都好似好耐無問過，感覺真好。

2010年11月16日係老公骨髓移植的日子，為左記念這一個日子，我們將呢日定為＜老公住院節紀念日＞。當日將會有一系列的紀念活動，到時再同大家分享。

感謝天父的保守，感謝捐贈者的無私捐贈，我們會盡力好好去過得來不易的每一天。

DAY +328 踏入工作第二週

時間過得好快，老公已上班一星期，這星期老公說一切還好。在公司暫時也不會忙碌，同事對他也很照顧。特別多謝那位特別為老公預備了蒸爐翻熱飯盒的同事，她不但預備蒸爐，還細心的把它清潔消毒，真係好好～老公唔洗用微波爐叮飯，真係好^^

老公說在公司，看到熟識的環境，熟識的面孔，感到好像在做夢，就好像一切沒有發生，有點意想不到，感覺好特別，我也不知如何形容他的心情。

一件突如奇來的事，把我們從正常平靜的世界，帶到死蔭幽谷之中，經歷死亡的威脅、肉身及精神上的折磨，好像很難過，甚至走不過。但在期間卻滿有恩典，一步一步帶領著我們走過，現在就好像返回從前那平靜的世界。回頭望的時候，荊棘滿途的道路，卻原來是恩典之路，感謝天父。

詩歌再分享: 恩典之路

祢是我的主　引我走正義路
高山或低谷　都是祢在保護
萬人中唯獨　祢愛我認識我
永遠不變的應許　這一生　都是祝福
一步又一步　這是恩典之路
祢愛　祢手　將我緊緊抓住
一步又一步　這是盼望之路
祢愛　祢手　牽引我走這人生路

DAY +321 重返工作崗位

過去647日，老公忙住醫病養病，做大王，做灰伙子，做柴可夫，今天他正式重回工作崗位！

之前幾日老公就好似一個小朋友預備新學期開學咁，去添置新衫新用具。其實老公之所以要買過哂所有野返工，係因為佢既好老婆在他患病期間，將佢既恤衫西褲皮鞋同公事包都丟哂，又或者收埋之後唔記得收左去邊....-_-

已經好耐無試過幫老公燙衫，真想不到這一情境會再次出現，依家先發覺可以幫老公燙衫係好幸福的。

老公的公司對老公不錯，老公患病期間，安排老公停薪留職，讓他可繼續享用公司的醫療保險，過時過節的禮物也會請同事送來給我們。現在老公重新上班，他們也很歡迎，還為老公提供方便，讓他可按身體情況可隨時請假，這實在太好了！

老公的同事們，過去辛苦你地喇，多謝你地既探訪問候同做信差。

唔知老公第一日返工點呢？見返Ｄ舊同事感覺又點呢？佢會唔會好攰呢？老公加油！

感謝天父，在過去的日子都有豐富的供應，以致我們從不缺乏。

可以返工也是一種福氣，我也為我可每天上班而感恩！

DAY +307 No news is good news

好似好耐都冇UPDATE….其實係因為個BLOG 壞左，話說中秋節當日我打了一篇好精彩既回顧，點知一按UPLOAD，竟然淨係得返個標題，激死我。
 

雖然那篇回顧很精彩，但係要再次帶著感恩同眼淚打一次真係唔係咁易，所以要到下年中秋先再打得返LU！

 

上星期四係六星期的覆診日，因為之後一日我就去左國內探訪，所以到依家先UPDATE返。

 

覆診日老公未見醫生佢個心就已經卜卜卜咁係咁跳，為佢成日覺得自己對手白又易攰一定係有咩唔妥，所以勁緊張～結果醫生話報告幾好呀，冇咩大問題，六個星期後先再覆診，仲話可以返工喇。YEAH~ 暫時冇事！

 

我當然問左醫生手掌白係唔係有問題，醫生話白未必有問題，只要血色素冇問題就冇問題！哈哈！即係話手白同病發係冇關係既～老公真係傻豬！

 

多謝各位一直以來對老公的關注，陪他走上康復之路～黎緊我開始實習喇，每個星期除左返工，仲要到實習單位返16小時，所以這個BLOG可能會UPDATE得較疏，但也會不定期將老公的情況發佈的。總之沒有特別消息就是好消息了，哈哈！

我們開始預備返回正常忙碌既生活了！不過提醒自己也提醒大家，再忙也要珍惜同親朋好友以及天父相處既時間，仲要照顧好健康！

DAY +300 中秋節、玩燈籠、食月餅

DAY +287 灰伙子變白

經過一系列多姿多采的生活，老公前幾日覺得唔係好舒服，無電的情況出現了。老公說總覺得渾身不自在，整個人很疲倦。但係未有任何發燒或傷風的病徵，所以暫時未有睇醫生。依家就乖乖的留在家休息休息同休息，充電充電同充電。

老公好得意架，佢好鍾意成日攤大對手掌，自己望下望下，望到入哂神，好似在研究掌紋。當然老公唔係在睇掌紋，而係在睇下自己對手有冇白左。佢成日都同我講：＂老婆，你睇下我手掌好似又白左，可能我唔夠血喇！＂跟住又要拎我隻手去比較，跟住就會說：＂你睇我隻手同你隻手Ｄ色差幾遠，我一定係唔夠血喇，會唔會係復發呢？＂

因為我本身係黑底，膚色比較深，而且隻手又厚肉，所以長期都會深色Ｄ，老公搵我隻手去比，一定會覺得自己白。我成日都話佢知，唔係你隻手白是我太黑，佢就係唔信，哈哈^^～
依家佢唔拎我隻手去比喇，佢自己同自己比，對白就改為：＂老婆，你睇下我手掌好似比尋日白左，我唔夠血喇！＂

老公頭又大手又大，成日攤大對手，個大頭又擰擰下，真係好可愛～　究竟睇隻手既顏色係唔係可以知道自己夠唔夠血既呢？等我下次問下醫生先。

DAY +279 雜記

今日老公到了醫院探訪一位我地一直都記掛著的朋友。空中通訊了一段日子，終於見面了。可以跟病友一起互相分享支持係一件好開心嘅事。

唔知點解自從老公患病之後，總覺得血癌好似係一個好普遍嘅病咁，唔覺唔覺就會發現有朋友，或者朋友嘅朋友有呢個病。

血癌有好多種，而且每個人體質不同，病情變化都不同，回想起當初日日都見步行步，唔知之後會係點，難免會感到徬徨。那時，我地都成日上網搵資料，睇下有冇病友曾經發生過類似嘅經驗，雖然搵到有差不多經驗嘅，變化也會不同，但係搵到同路人，也會有一些共鳴同安慰。

唔知有冇病友會唔覺意路過呢個BLOG呢? 希望老公嘅經歷也可以俾到小小資料、安慰同鼓勵你地喇。如果你地有咩需要，即管留言或電郵俾我地喇，我地好樂意將我地知道嘅同你地分享，不過當然有關病況既野都係問番醫生喇。除左分享，我地也樂意為你地代禱的，有需要就通知我地喇，必盡力而為！

－－－－－－－－－－－－－－－－－－－－－－－－－－－－－－－－－－－－－－

這幾天我們都好悠閒，老公考到牌升呢做柴可夫，我當然唔會放過佢喇！我地趁放假同朋友去了郊遊，望住藍天碧海青草地都真係好舒服呀！以前我地一定唔會有咁好閒情去享受生活，依家真係要同大家講句，放鬆下喇香港人！有時間要去欣賞一下天父的創造，讓身心靈充充電。

呢幾日亦都証明左一樣野，就係我考牌那天可以PASS絕對係匪夷所思。因為我早幾天去運輸署拎到個牌唔夠 2 小時就已經撞左埋牆，令鬼馬呠呠車多了道疤痕......(其實多條疤咪仲型，唔好咁傷心喇！）

DAY +271 大滿足日

今日好開心~~開心在咩呢?

開心一： 老公可以揸車車佢２名好兄弟。進出醫院期間，他的兩名好兄弟為免葉爸葉媽舟車勞動，長途跋涉由將軍澳去東區及瑪麗醫院，常常不辭勞苦的找藉口接送我地。老公冇諗過自己可以有命考牌同揸車，更加冇諗過竟然可以揸車回饋他的兩名好兄弟，所以佢真係勁開心！

鬼馬呠呠車

開心二：今日老公可以同佢人生中最重要的其中5個人一起食晚飯 (可惜細佬不在，唔係就差不多齊哂）。呢5個人係邊個，當然就係老爺奶奶，兩名好兄弟，同埋本人^^！老爺奶奶一直都當兩名兄弟是半邊仔，我地一起經歷患難，一起經歷恩典，互相扶持，互相守望，今日聚首一堂，閒話家常，說說笑笑，儼如一家人，我諗在場每個人都好開心，這天得來不易，真係好開心呀。

開心三：今日有大餐食！真係好飽！突如期來的齊人食飯，並沒有令老爺奶奶措手不及。今日佢地最愛既仔仔，新抱同契仔們到訪，佢地做了一桌好餸款待，食到我地個個攬住個肚走人，等我介紹一下今日既菜式，等大家冇得食都有得睇下，哈哈！

湯：紅蘿蔔粟米南瓜湯

餸：

清炒白菜仔

招牌肉鬆四季豆

秘製數字骨

豉汁青椒炒牛肉

薑蔥炒肉蟹

清蒸多寶魚

甜品：雪糕

餐飲：紅酒，可樂，啤酒

感謝天父讓我們可聚首分享食物，分享歡樂！

P.S. 最最開開心係有得食，有得玩，但係唔洗付出任何勞力！感謝老爺奶奶豐富的預備！辛苦哂 ^^

DAY +267 危險人物出沒注意

先說句對不起，今天的網誌跟我的病情無關，是應老婆要求為她代「筆」的。


老婆今天考路試，竟然合格，真的有神蹟發生！

根據我跟她車的經驗（同一間學院的學生是可以作跟車練習的），她基本上是不會合格的，幾天之前師傅還叫她補多 7 小時才考，只是時間太緊迫已經再加唔到鐘。但既然已經報名，只好繼續應考，就當是吸收一次考試經驗吧。

下午，還掛起黃色暴雨警告。天下著傾盤大雨，等了很久還不見老婆的車回來，心感不妙。難道真的「天亡我也」？


想不到考官竟然等到雨細了之後才上車開始考試，而且最後她竟然合格，真的不可思議，感謝主！

拿成績單的時候，她反過來看還以為不合格。看清楚之後，她的動作只有一個：就是連續的傻笑了好幾分鐘！


哈哈，大家以後出街見到有 P 牌的私家車最好是小心點了~

她也可以由 L 轉做 P 了~

DAY +266 6星期通行証

老公昨日覆診，今次竟然係見拉哥，仲以為有咩大變化。幸好，老公除了血壓高之外，一切算穩定。

醫生說驗血報告反映一切穩定，繼續減藥，6星期後先再覆診，仲叫老公可以同公司傾定復工o既安排。

老公血小板得87，比正常170-380 低一半。老公問醫生血小板係咁唔升有冇問題，醫生話：＂一半夠用喇，腎都係GA，你都係用一個GA JA。"醫生真風趣。

明天好像會狂風大暴雨，明天考試，凶多吉少～　

DAY +260 灰伙子「升呢」

老公今日好叻仔..佢今日考車一TAKE 過PASS 左....YEAH!

去年 12 月中，還記得老公當日骨移後第一次返瑪麗覆診，天寒地凍，又找不到的士，又怕遲到既徬徨。當日我話：＂如果我之前的起心肝去學車，今日既事就唔會發生喇，我要付諸行動先得。＂

講完呢句說話，我當然無的起心肝去學車，如是者過了４個月，我以為可以不了了之，點知老公前排又提起呢件事，叫我好去學車，我當然繼續愛理不理。直到有一日向老公再三催促下我終於的起心肝去報名，仲慫恿老公一齊報名TIM。老公O果時話，自己今日唔知聽日事，分分鐘要入院，到時上唔到堂考唔到試就會浪費哂Ｄ學費。最後，老公知道可以分階段付款，以及在我威迫利誘之下佢先乖乖地報左名。

今日老公考路試了，成功ＰＡＳＳ左。即係過去幾個月佢都能夠順利健康的上堂同考試，仲冇因為身體不適而走堂TIM。雖然考試合格好開心，但更開心既係老公抱著今日唔知聽日事，見步行步既心情，完成了一個之前佢以為好難，甚至有機會爛尾既事情，對佢黎講係一個好大的鼓勵及提醒。

感謝天父的保守~~~~

YEAH~~以後灰伙子可以「升呢」做埋柴可夫了~

至於我，原本同老公同步學車既，但因為這星期太忙，所以推遲了考試日期，下星期先考。

除非有神蹟發生喇，唔係我諗我都係要補考補考再補考。因為天生冇咩方向感，對機械操作又笨，只剩下3堂共６小時，但師傅都仲係堂堂要幫我扭軑同踩BREAK，師傅話我軚盤不穩，腳制及油門使用不當，行車位置不正確，太接近物體。師傅仲毫不留情的說....幾十個學生入面至會撞到一個好似我呢D咁既學生.... -_-

為左行人同駕車人士的安全，我諗我都係做乘客好Ｄ^^

DAY +257 老公做義工

老公近來也不錯, 感謝天父!

上星期是老公的生日, 忙到都唔記得呢個係老公移植後的首個壽晨。O果日冇咩特別慶祝, 只是靜靜的兩個人出外吃飯 (其實自老公認為自己可以外出食飯之後, 我地已經日日也是出街食)。2個人能一起吃一餐比平日看來更有意義的飯, 我地都好開心。

最近, 因為公司實在太多野做, 所以老公呢個灰伙子, 唔止要幫手做家務, 仲要去我公司做義工, 就連昨日星期六也不例外。有老公一起返工的日子真係好。之前成日請假去醫院陪老公, 依家老公係時候回報一下我公司了。哈哈^^

未來一星期會很忙很忙, 相信也要下星期才會UPDATE了。

不過還好老公下次覆診是8月8日，總算岩岩忙完，可以繼續陪老公覆診。天父的安排真係好好，平時都是三星期覆診一次，今次竟是四星期，岩岩避開的忙碌既工作。感謝感謝天父，一直以來都為我時間上的分配作最好的安排，真窩心！

DAY +250 奶奶的分享

這兩天見到一些親朋好友，他們都問到，為何這麼久也沒有Update這個Blog，多謝大家仍然這樣關心我們。

十分抱歉，最近工作很忙碌，雖然已在這公司工作快8年，但是仍然有好多新的工作，新的挑戰，新的學習需要時常掛心，所以過去一星期心思意念都在工作上，沒有update，請見諒。

章魚最近狀態都可以，只是較之前容易感到疲倦，需要多休息，總算平穩。^^

昨日是為奶奶慶祝大壽的大日子，雖然生日年年都會有，但是相信這個生日對奶奶來說份外有意義。

昨日罕有的宴請了親友及朋友一起為葉媽慶祝，年過90的公公婆婆，以及葉媽相識數十載的好友也聚首一起。

奶奶亦借這個機會分享了一些心聲，憑記憶節錄如下：

"今日好多謝大家一起來分享我的喜悅，雖然今日只有唔係話好多人，但係已包括很多好重要嘅人，包括我 91 歲嘅爸爸，八十幾歲嘅媽媽，我嘅細佬妹同家人，姨甥姪仔。當中有在我好艱難好辛苦嘅日子陪我一起過嘅好朋友梅牧師一家人，還有我在澳門讀書的同學，更有失散了廿幾年無意中撞返的朋友。好感恩。

在我個仔有事開始的時候，仲有好多弟兄姊妹默默的為我們一家禱告。我覺得好感恩。

另外，講返今日有呢個機會同大家一起我覺得真係一ｄ都唔簡單。因為大家都知我個仔舊年開始有重病，我地大家經歷在一段真係好艱辛好唔容易的日子，當中的辛酸真係不足同外人道，要在當中先可以體會到。但係好感謝神我地都過左喇，亦感謝神俾我個仔有個不離不棄嘅太太，可以分擔我同世幟嘅難處同辛勞，這些全都是天父幫助我地。

能夠大家一起我真係好開心，我仲記得震宇最辛苦嘅時候，佢向醫院有一日同我講，媽媽如果我能夠出院嘅話，我想同你做大生日。因為佢有過心願就係同過爸爸做左都想同媽媽做。我當時真係聽下都好開心。因為當時真係今日唔知聽日事，當時嘅環境佢嘅情況係好差，我地大家都心知的，但係我地大家都唔敢講出聲，只係都放在心裡頭。所以到後來，我好感謝神俾個機會我個仔，在危急嘅時候可以做骨髓移植，呢個真係好唔容易，係當中經歷嘅野...真係..好難。試過話有得做，之後又話冇得做，得到時又話唔得，果種感覺好忐忑。但係神真係俾機會我個仔，佢能夠向以為冇可能嘅情況下，俾佢做到骨髓移植，醫治佢。

到左上幾個禮拜，佢同新抱同我講，媽媽，我同你做大生日。嘩！我真係好開心，因為咁耐之前嘅事我以為佢已經唔記得，原來佢仲記住。當時好開心，但係坦白講我好怕同咁多人一起，我會好緊張。但係呢個係個仔嘅心願，所以我接受左。經歷左咁多野，我明白左人生有好多未知之數，有好多事唔知道幾時發生，所以我學識接受同珍惜。今日能夠同大家一起我真係好感恩，都好多謝大家嘅來臨。

最緊要係感謝主耶穌佢俾我地一家人係行呢條路嘅時候有好大嘅鼓勵同幫助，唔係我地都行唔到黎今日。亦好感謝神俾我地一家人都認識佢，以至我地向困難嘅時候我地都可以互相扶持。再次多謝大家，感謝天父。＂

葉媽講得好好，要不是天父的拖帶，我們一家如何能夠行到今日。如沒有天父的允許，我地又豈可為葉媽慶祝生日呢？多謝天父給予我們這麼多寶貴嘅禮物。

一切也不是理所當然，希望大家也可以明白"珍惜"的重要喇。

DAY +238 覆診順利

昨天老公覆診，各指數沒有大升大跌，成績表不錯。

昨天我們遲了出發，但到達醫院竟然都只是排第二。後來發現原來因為其中一位醫生放假，所以昨日只有十多位病人。

是次有靚女醫生接見老公，第一次見這位醫生，也是快手快腳的。老公情況穩定，沒多說兩句就趕我們走了，四星期後才覆診^^。

是次去旅行後覆診順利，咁我地係唔係可以計劃一下去個長Ｄ遠Ｄ既旅行呢？哈哈...真係貪心的人。

DAY +237 恩典太美麗

四日墾丁之旅轉眼間就完結了，首先必須感謝天父的保守，讓我們開開心心的出發，平平安安的回來。
這四天，我們沒有大吃大喝、沒有同陽光玩遊戲、沒有花花世界、也沒有瘋狂購物；但卻是恩典處處。

先講天氣，第一天去到的天氣好得很，陽光猛烈，好彩不能曬太陽的老公去到墾丁已差不多日落，避開了陽光，但我們欣賞到美麗的咸蛋黃。第二天是外出旅遊的一天，天氣也很好，風和日麗，還有很大的風，太陽的熱力跟風互相配合，令我們不會感到太熱。第三天早上下了大雨，到我們起身時，雨已停了，這天沒有陽光，令我們有機會可以去沙灘坐坐，吹吹海風。下午去到高雄，下了微微的雨，但下雨的時間我們均在室內，沒有開過傘。最後一天，天氣陰陰的，到我們上了的士去機場時才下滂沱大雨。天氣的配合是何等奇妙呢！

再講住宿，去到民宿，我們發現民宿的主人一家都是基督徒，份外感到親切，他們人很好，幫我們安排車，安排一日遊，還借埋電話咭給我們，還多次義載我們來回墾到大街同民宿（步行要一小時，而且是沒有的士的）。民宿的景色很美是面對著海的，不出外，坐在陽台喝喝東西也很舒服輕鬆。

而食方面，是次行程就比較遜色一點，因為我們都好乖沒有亂別東西，繼續跟醫院的指引。墾丁最出名的就是海鮮、街頭小吃同各式的茶（如：珍珠奶茶）。這些都是老公唔可以食既，所以我們都沒有食。唔食呢D有咩食呢？結果我們吃得最多的就是7-11的滿漢大餐、波仔飯同關東煮。其實外出旅遊的一天，導遊都好好，成日都買野請我們食，佢請我地飲椰子水、食菠蘿、冬瓜水....仲要一買就買兩份俾我地，老公唔可以食呢Ｄ野，為了不辜負黃大哥的心意，所以我一個人吃了兩份，總算見識過地道既食物，但食得太多，結果晚飯都吃不下，個肚仲唔係好舒服。好彩不舒服的是我而不是老公，我過了一晚亦已經冇事了。

可以同老公一齊去旅行，真係好開心，這份禮物真的很好，大自然景色真的很美麗，這就是天父偉大的創造。

過多幾個小時，我們又要出發去覆診了，有機會再跟大家分享行程的趣事喇。

沒有買到任何的手信，就送大家美麗的相片：

從民宿看出去的景色

日落美景

藍天白雲

老公的背影

一望無際的海洋

海天一色





漂亮的晚霞


P.S. 彬哥的提醒很好，上帝的恩典就好像旅行拍的照片一樣美麗，所以今天的標題便更改成「恩典太美麗」。





DAY +229 準備衝出香港~

老公這幾天狀態好像開始好起來，咳已慢慢減少了，胃口也不錯，真係令人好開心，感謝天父。

7月1日好開心，因為那天可以參與籌辦教會的夫婦聯合聚會，今次的主題是「我真的需要您」。可以跟小組的弟兄姊妹一起侍奉很開心呢，而更開心的是可以在聚會中榮耀神的名，多謝天父俾我地有呢個機會，YEAH!　希望當日出席的夫婦都ENJOY喇。

呢個星期四，我同老公會出發去墾丁旅行，是繼兩年前的蜜月旅行後的首次二人旅行。墾丁是老公未病之前原本已計劃去的地方，因為我地都係懶鬼，最怕就係要去好多景點觀光，最鍾意就係去Ｄ好悠遊既地方休息。

老公之前話好耐冇去旅行了，所以個多月之前的一次覆診，我就問醫生可唔可以去旅行（出院明細內是註明要外遊需先咨詢醫生意見）。

我：醫生我地去旅行得唔得呀？
醫：去旅行...想去邊呀？
我：都唔過份，近近地去個台灣已經好開心。
醫：去台灣，去幾多日呀？
我：想去4日
醫：UM...都應該冇問題既。不過記得帶齊Ｄ藥去WOO, 藥一定要食足
我：一定一定
醫：去到有咩唔舒服就去醫院喇，去台灣唔好亂食野，呢排台灣既食物唔係好信得過
我：知道！
老公出左醫生房笑得好開心。

原來咁容易就成功左, 問之前我仲好鬼驚TIM。哈哈，醫生俾老公去旅行，即係老公情況都幾好喇（一個月前）。^^

墾丁，We are coming!

DAY +224 咳了又咳

又過了一星期，感謝天父一直以來的看顧及保守～

這星期老公都是咳...咳.....咳......

過了一星期吃完了所有抗生素也沒有好轉，所以去了睇醫生，醫生又開了好多藥佢食。食完藥又變得＂瘟瘟燈燈＂，長期渴睡同冇胃口。

天氣唔好，食藥休息下都好既，老公唔洗心思思想出街，哈哈。

近排，老公成個人都好乾，頭又甩皮，面又甩皮，連背脊都甩皮。其實醫生早在出院既時候，已經叮囑老公要每天查潤膚膏，出街要塗防曬，戴帽戴太陽眼鏡。懶惰的老公梗係唔會做咁多所謂"女人野"喇。結果，依家情況嚴重了。

為了彌補老公的懶惰，依家每天都要幫佢敷MASK, 塗 BB油 (這個當然就不是每天啦~)，仲要幫頭髮焗埋油。實驗証明，MASK真係有效，敷了個幾星期，老公的皮膚已經有明顯既改善。睇黎除咗幫老公之外，我都唔可以懶惰，保養下自己先得，嘻嘻。

老公真係唔乖，佢竟然趁我打BLOG既時候，明目張膽的在吃朱古力手指餅 -_- ... !!! 當我鬧佢"咳仲食朱古力！"  佢既回應係"食咗 2條之麻＂（但佢又冇數到手上面正預備放入口的第3條..>_<）唔喝止佢一定會不停食，正餐又話冇胃口食，真係激死我！　

成日聽到老公的咳聲，令我想起這個經典廣告（純粹分享，並冇宣傳之意）
http://www.youtube.com/watch?v=YAau4pQU7K8

DAY +216 覆診／告別弟兄

今天又是打遊戲機同飲咖啡嘅覆診日（幾輕鬆^^)。輕鬆了 5 小時，見到醫生。

醫生第一句就係"你好，請座，近排點呢？＂，於是我就 Bilibala Belibala 將老公近來嘅唔舒服逐一數出黎。醫生問完問題，其實並唔係期待我嘅答案，他只是想借我回答嘅呢段小小的空檔黎睇睇電腦入面老公的驗血報告。雖然明知醫生冇咩點聽，但我也好配合咁交足功課盡量延長呢個時間....

講完無聊既野，講返正題。

老公今次的驗血結果，各指數跌了一點，不太好，但未算太差。醫生說尚算穩定，繼續食返之前嘅藥，份量也再輕微減輕，三星期後覆診。通常到咗呢個醫生想打發我地走嘅時候，我又會再次 Belibala 的重覆老公身體嘅問題，老公呢排咳得有ｄ嚴重（當我講時，老公好合作的即時咳），醫生說咳唔係咁好，要注意一下，額外開了止咳丸同抗生素，並叮囑一星期唔好返，就要再睇醫生。

當醫生再次想同我地 say goodbye 嘅時候，我又不厭其煩的，再問上次抽骨髓嘅結果如何，醫生看了看電腦，只回答了＂幾好＂兩個字。我當然唔係好滿意，再追問醫生壞細胞有幾多。醫生淡淡的說＂冇＂，之後下一句就係＂下次覆診見。＂

到咗呢度，我地都唔好意思唔走。醫生一日睇十幾個病人，所以都要講求效率先可以縮短大家等候嘅時間，其實只要肯問，醫生一定會答，所以結論係醫生是一個好人。




今天晚上參加了教會一位弟兄的安息禮拜，弟兄是因病離世的，過去年多祈禱會的代禱事項，也包括老公跟這位弟兄的病情，禱告永不止息。我們跟弟兄就是在代禱中認識，互相記念。

牧師在慰勉中分享到弟兄在患病時候情況時好時壞，壞的時間比好的還要多。聽到這裡心中難免有一點沉重及悲傷。昔日老公跟弟兄同在幽暗當中，就像一起打仗的戰友。還記得弟兄曾在身體狀況稍為好轉的時候跟牧師一同到醫院隔離病房探訪老公。一直以來在禱告中記念弟兄，也希望在老公情況穩定時，可到醫院探望弟兄，為他打氣，可是現在已沒有機會了......

從葉牧師慰勉分享中知道弟兄雖然經過了很多的痛苦，但最後都能在家人親友旁含笑離開，患病的的路極不好走，但過程中弟兄得著比生命更寶貴的東西，重修與家人的關係，也知道弟兄走得平安，心中雖感沉重，但卻有一點安慰。

感謝天父讓我們今天能親身到禮堂送別弟兄。

弟兄，天家再會！


<Amazing Grace>

奇異恩典 何等甘甜 我罪已得赦免
前我失喪 今被尋回 瞎眼今得看見
如此恩典 使我敬畏 使我心得安慰
初信之時 既蒙恩惠 真是何等寶貴

許多危險 試煉網羅 我已安然經過
靠主恩典 安全不怕 更引導我歸家
將來禧年 聖徒歡聚 恩光愛誼千年
喜樂頌讚 在父座前 深望那日快現     

DAY +208 充電→放電→冇電

各位好，又過了一個星期，感謝天父。

老公自上星期六狀態大勇，一直精神了好幾天，食盡大江南北，見盡親朋好友。直至星期五終於用哂D電，突然疲勞，要立即坐的士回家充電。

可能之前用電超哂錶，呢次充電的時間比較需時，而且充完電用一陣又冇電。

自星期五下午，老公一直休息到尋晚才出發前往表妹的婚宴（個個星期都有得去飲^^)，婚宴未完，老公已經頂唔順，又由昨晚休息到今朝返崇拜，崇拜未完又頂唔順要先走。直到依家老公既精神仍未回復，要卧床叉電了。

老公你要乖Ｄ喇，做事要適可而止，唔可以去到咁盡，好好向屋企休養返幾日先好再出去喇！

DAY +200 二百天的寶寶

今日係老公其中一個好兄弟，護士先生娶老婆既大日子。首先祝福他們恩愛甜蜜，主愛滿家庭～

弟兄的拍拖亦見證著老公的患病，當年我們第一次見阿嫂就是在養和醫院。那天是他們拍拖的第一個聖誕節，原本他們當日是買了飛去廸士尼樂園，點知最後因為老公突然入院，他們都放棄了廸士尼之旅黎醫院幫手安排。阿嫂是個溫柔體貼有愛心的人，她不但沒有怪責護士先生，仲義不容辭的為我們代禱同提供協助，更送上匙扣版聖經給我同老公。

其實我地一直都為著破壞了他們的浪漫之旅而耿耿於懷，好彩，護士先生之後有再帶阿嫂遊廸士尼，更在那天求婚成功。今日見證著他們的婚禮，見到護士先生扮米奇老鼠表演魔術，當日的遺憾換來了更有意義的廸士尼之旅。我們都好開心好感恩。

感恩的還有老公，他一直好渴望參加好朋友的婚禮，骨髓移植前佢仲吩咐我，萬一佢返左天家參加唔到護士先生的婚禮，也要為他送上大禮，代為祝賀。今天老公不單可親手送上賀禮，仲做埋兄弟，全程參加見證好兄弟結婚，更在骨髓移植後破天荒參加婚宴，興奮既心情令佢都唔記得自己未完全康復，竟斗膽全日唔戴口罩！！我睇見老公興奮的在場內走來走去，我都好開心，感謝天父。忙了一天，老公仍然有精神坐在我旁邊睇我打字，真係犀利。往日的老公回來了！ＹＥＡＨ！


經文分享：傳道書4:9-12
兩個人總比一個人好，因為二人勞碌同得美好的果效。
若是跌倒，這人可以扶起他的同伴。若是孤身跌倒，沒有別人扶起他來，這人就有禍了。
再者，二人同睡，就都煖和；一人獨睡，怎能煖和呢？
有人攻勝孤身一人，若有二人便能敵擋他。三股合成的繩子，不容易折斷。


三股合成的繩子不容易折斷。未結婚前，曾聽過這段經文，更送了三條繩編織而成的一條繩給一位姊妹作為結婚禮物。當時只感到比喻很有意思，但未完全體會當中的含意。今天再次聽到這段經文，我深深感受兩個人總比一個人好的道理；更好的就是主耶穌與我們同在，一起合成堅固的繩，即使面對勞碌、跌倒、攻擊，我們也不再懼怕，不會折斷。祝福新婚的弟兄姊妹，以及所有夫婦，在主耶穌的看顧下強而有力，婚姻美滿。

DAY +195 抽骨髓日

今朝我同老公都當鬧鐘冇到，原本打算五點起身，結果六點先驚醒。去到醫院六點十（極速），又不太差，都排第四。

不過其實排幾多都不大關係，原來今天是抽骨髓的日子，所以一定要攪全日。

老公岩岩已經抽左骨髓，以前個幾月就抽一次，都抽到麻木哂，今次隔左半年先抽，太耐冇抽都好鬼驚痛（係我驚佢痛）。老公都好勁，只是稍微流露出痛苦表情，依家已經可以下床。

骨髓報告冇咁快出，不過如果有咩事醫院一定會打俾我地既。

講返今日覆診先，岩岩見完醫生，醫生說血的指數雖然仍然偏低，但都算不錯，估計身體問題不大，如冇特別通知，三星期後覆診。

今次我都問醫生，咁依家呢個狀況算不算移植成功呢？醫生既回覆係話，現階段言之尚早，最少要觀察一年先可定案。暫時仍要保持戒備狀態，繼續留在家中休息，唔好諗返工住，最少休養多三五個月才再作打算。

依家我地等拎藥，預計要等三小時。

感謝天父的保守。

DAY +193 狀態回勇

自結婚週年紀念日起，老公身體的狀態開始逐漸回復了。雖然仍有些微的咳嗽，但是精神轉好了，可以有氣力到街上走走，胃口亦慢慢轉好了，多謝天父。

下星期一又是覆診日，唔知會唔會抽骨髓驗呢？之前醫生說半年左右就會抽骨髓驗一下，看看移植後的情況，睇下有沒有壞既細胞。

間中都有關心我們的朋友問到，都過左咁耐，其實幾時先算係好返呢？其實我都唔係好知答案，因為醫生都冇講過點界定。不過我諗骨髓報告的結果應該會反映到骨髓移植的成效及病情。現在相信仍是觀察期。

星期一覆診有新的資料再同大家分享。

DAY +188 當年今日

今日是一個好特別的日子, 兩年前的今日在親友的見証下 我跟老公在神的面前許下承諾, 從今以後, 我們在神聖的婚約中共同生活, 無論是順利或失意, 貧窮或富裕, 疾病或健康,我們都願意愛對方, 互相安慰, 互相尊重, 互相保護, 並願意在我們一生之中對對方永遠忠心不變.

曾經有擔心過結婚一週年也來不及慶祝, 老公便要先返天家, 當時我在禱告中求天父至少也要讓我同老公渡過結婚一週年, 結果禱告蒙應允, 去年我跟老公在東區醫院隔離病房渡過了一週年結婚紀念日. 當時老公化療後白血球一直不升, 還受細菌感染, 傷口含膿, 面臨放膿手術. 當日雖然沒有特別慶祝活動, 但是仍可以陪在老公身邊靜靜的一起, 不用什麼東西也已是天父給我們最好的禮物.

天父的恩典真的夠我們用, 更超出我們的所想所求. 不止一週年, 今日我們可以慶祝兩週年紀念了. 曾經遙不可及的事, 今天我們可以再次慶祝 , 天父多謝祢!

我們都不知一起的日子會有 多長, 往後會繼續珍惜與老公在神聖的婚約中共同生活的每一天. 無論是順利或失意, 貧窮或富裕, 疾病或健康,我們都願意愛對方, 互相安慰, 互相尊重, 互相保護, 並願意在我們一生之中對對方永遠忠心不變. 感謝天父.

紀念日那天在挪亞方舟無意中取得的一份有意義的禮物

DAY +185 迴光日?!

上星期日老公命名為"迴光日"，因為上星期日那一點的精神，支撐不到星期一。

星期一早上老公又去睇西醫，今次去左另一間醫務所，醫生開了8種藥丸同一支藥水，從未試過睇醫生咁抵，同一個價錢有咁多藥（C9仔性格）。唔知D藥勁得滯定老公太弱。食左藥之後又再次整日大昏迷，食欲不振，個胃唔舒服，仲嘔添，咳嗽不止，這5天都是這樣。 不過慶幸他已沒有再發燒。

今日昏迷的情況改善了，但胃口仍然欠佳。每天晚上煮好Ｄ野食，老公食一兩啖就會話食唔落，勉強食多幾啖就要嘔。佢成日都話我好肚餓，但係我食唔落。好似我呢Ｄ咁鍾意食野既人，真係唔係好明白佢呢個矛盾的感覺。見到佢食飯就覺得佢好辛苦。十大我最喜愛的餐廳也都吸引唔到老公，唔通佢有厭食症？

好可憐呀～

DAY + 180 半歲生日

Happy Birthday to you~ Happy Birthday to you~ Happy Birthday to 老公~ Happy Birthday to you~~~

哈哈，一生人慶祝生日會的機會有好多，BB仔開始會慶祝出生日，一星期生日，滿月，百日宴，半歲生日，1歲生日，2歲生日，3歲...5歲...10歲...18歲...20歲....30歲....60歲...70歲.....100歲。開頭我地會慶祝得密D，慢慢會疏起來，亦開始慢慢不重視。

嘻嘻，我依家就當左老公係BB，佢已經由DAY 0 去到今日DAY +180喇...真係可喜可賀，希望大家唔會覺得我地日日在數日子好無聊喇。我都希望慢慢可以唔再一日一日的數，可以好自然咁過日子，唔覺唔覺又過一年...唔覺唔覺老公就快肥長大...哈哈^^

老公今天的精神好了一點，還主動提出想出外行下，匿在家中休養了一段時間，今日終於有點突破。雖然鼻水長流不息，用了好多盒紙巾，但估計感冒應該比之前好了，胃口也好了，聽日再睇多次醫生，希望可以盡快斷尾喇。

醫院冇打黎，咁我就假設上次的照肺、心電圖同鼻分秘物檢驗PASS 喇~

多謝各位的關注，最重要是多謝大家的代禱，多謝天父聽禱告～

DAY +177 探熱針好朋友

老公情況仍是差不多，繼續間歇性地低燒，咳嗽，流鼻水。每逢老公發燒的時候，探熱針就是他的好朋友，總有一支在附近。而近來最常見老公的的模樣，除了卧床休息，就是含著探熱針探熱。探得熱多雖然不代表會退熱，但每次探熱就好像有一個痊癒既機會一樣。

這個病況已維持了13日，我都知老公難免都會有擔心，亦都會好渴望可以快D精神番，快Ｄ退熱，這個也是我的希望。老公好快會好起來的，老公加油～　體內的細胞快D乖乖打勝仗喇！

匿名的引用的經文，很有意思很貼題亦很激勵，不得不再在此分享一次，謝謝～

＂當章魚遇上風；恩典就隋風托住章魚，加油呀 ^.^＂

-01 聖靈如風是何意義？
耶穌說：「風隨著意思吹，你聽見風的響聲，卻不曉得從哪裏來，往哪裏去；凡從聖靈生的，也是如此。」（約 3：8）

風是肉眼不能見的，聖靈也是肉眼不能眼的；神是靈，非肉眼所能見。風的果效卻是有目共睹，如風能使帆船前進；能使風箏向上飄；能使火焰旺盛。同樣的，當聖靈於五旬節降臨時，如風吹過，門徒被聖靈充滿，就領受聖靈的恩賜，說起別國的話，見證基督的復活（徒2：1-4）。

舊約先知以西結論到屬靈的復興，也是以聖靈比喻風。主對我說：「人子啊，你要發預言，向風發預言，說主耶和華如此說：『氣息啊，要從四方（原文是風）而來，吹在這些被殺的人身上，使他們活了。』」（結 37：9）結果無生命的枯骨復活了，預表以色列的復興。信徒要復興，必定要被靈風吹動，方能成事。

詩歌分享: 聖靈，我們真歡迎你

聖靈，我們真歡迎你！
聖靈，我們真歡迎你！
求你聖火焚燒我們，如今我們放下世上所愛，
舉雙手深深渴慕你，親愛聖靈，我們歡迎，親愛聖靈，歡迎你來。

願你奇妙同在顯明，將你心意教導你的兒女，
順從你跟從你引導，親愛聖靈，我們歡迎，親愛聖靈，歡迎你來。
願你旨意今日成全，在我身上完成新的工作，
降服你毫無保留，親愛聖靈，我們歡迎，親愛聖靈，歡迎你來。

DAY +175 繼續燒章魚

都唔知點算好，老公都仲係低燒。見佢冇發冷又唔想送佢入院。醫生冇開退燒藥，不過自行食返之前睇西醫開的止痛退燒藥，吃了又稍微退燒，藥過了又燒過，洗唔洗送佢入院呢？還是等佢食埋D抗生素看看情況再算吧。

老公除左攰同軟弱無力之外，仲勁咳，有好多痰聲。不過老公呢個小朋友係唔識點吐痰的，所以吐不了。醫生說痰是吐出來好，至少可以拎去驗，不過老公就是吐不成功，激死人。

這個多星期，老公的胃口大減，每天只吃丁點東西就說冇胃口，他的體重直線下降，已經回到當日出院時既體重，移植後辛辛苦苦儲返黎既肉冇哂lu~ 原本已經唔係肥，依家仲要瘦Ｄ，萬一遲Ｄ打風都唔知會唔會俾風吹走，到時做左章魚風箏，我要拎條線綁住佢先得喇。

老公加油～　

當章魚遇上風

DAY +174 繼續觀察

今天覆診, 老公心跳過快, 醫生要老公做心電圖, 除此之外, 還去了照肺和抽了鼻內的分秘物檢查.

老公今早在醫院的體溫是37.5, 所以醫生不用老公住院. 但要密切留意, 如發燒或咳嗽不止需立即到瑪麗急症.

血指數可接受, 醫生開了抗生素. 如感冒可康覆, 三星期才覆診.

老公今天回家後全程休息, 晚上體溫升至38, 一度考慮送他到醫院, 最後決定多觀察一晚, 明早再按情況而定.

DAY +173 又轉差了

老公這幾天咳得很厲害，上星期四已帶他都醫務所看醫生，醫生當時說肺聽落沒有大問題，開了咳水及感冒藥俾老公食。

睇完醫生後，老公一直都有咳，前兩天精神還可以，但今天已咳到出唔到聲，體溫升到37.5，今天全日卧床，只是起身吃了兩口粥。

好不容易等到明天覆診，希望明天醫生會多檢查一下看看老公發生咩事喇。我會帶定入院三寶，萬一明天即時入院都唔會太手忙腳亂。

今天是母親節，祝各位母親快樂～　亦祝福大家可與母親和洽快樂的與母親相聚。

DAY +170 老公安好

這兩天公司比較忙碌，晚上又要開會，所以都未有空檔把老公的消息更新，不好意思。

老公剛剛已把最後一粒抗生素吃完，星期二至今，只是體溫較高，沒有再發燒了，感謝天父。

咳嗽、疲倦則持續，還有一點肚瀉。現在沒有抗生素了，就看看病況的進展，要是又轉差，就帶佢去睇醫生。

上次打電話回瑪麗詢問，姑娘說沒有發高燒應該沒有問題，再觀察下，如沒有高燒就按原定5月9日才覆診，但萬一咳嗽厲害了便要到急症／私家醫生求診，需要時照肺，以免肺炎。

今天已經是第170日，再過10天就是180日了。雖然180日不代表什麼，但半年就咁就過去了。轉眼間半年、一年、三年、五年、十年、二十年、四十年....我跟老公的日子便一日一的過...執子之手 與子皆老。

DAY +168 溫度下降了?!

老公昨晚體溫曾經升到37.6 (37.5視為發燒)，吃了退燒藥後徘徊在37.3左右，整晚我們也很擔心今天要入院呢。

今早起身在沒有吃退燒藥的情況下，體溫下降了，在36.9左右，見老公唔過37度，就先唔帶佢去瑪麗，睇定D先。

老公的病徵包括：頭痛、咳嗽、喉嚨發炎、疲倦、四肢冇力、發熱（沒有發冷）。

打了電話回骨髓移植門診備案，因為姑娘太忙，所以冇人聽，已留言，就等姑娘回覆時再看看有咩行動，唔知會唔會可以提前於本星期四覆診呢？

繼續交托。

DAY +167 微燒章魚

老公這幾天情況沒有好轉，即使吃了醫生開的抗生素，體溫仍然常在發燒邊緣。明天要是情況沒有好轉，我便會帶他到瑪麗醫院了，很可能明天便要留院。

發燒是一個警號，唔知佢身體入面發生咩事呢？入院查清楚也是好的。

另外，奶奶近來身體都不太好，昨天在參加讀經營期間還暈到了，也請大家記念她的身體吧。

DAY +165 灰伙子變睡王子

老公尋晚幸好沒有發燒，不過尋日佢整日都冇咩胃口，晚上煮左Ｄ野佢食，點知食完冇耐就嘔，將食既所有野都嘔哂出黎。今朝佢起身時都仲係覺得唔係好舒服。因為瑪麗的醫生說有咩事都唔可以自己亂食藥，有事唔清楚或唔舒服就要去急症室唔好等，所以以防萬一，我就帶佢去將軍澳醫院急症室睇醫生。

今日急症室冇咩人，好快就睇老公，老公話俾醫生聽佢覺得好累，頭唔舒服，喉嚨唔舒服，又有Ｄ鼻水，昨日體溫有上升的情況，但偷食了必理痛後已沒有進一步上升。醫生就可能是有感冒，未有燒，唔洗留醫，不過要好好監察體溫，休息多Ｄ，一有再勁Ｄ既唔舒服就要再返醫院，到時可能要留醫。

拎左藥就走得喇。見老公唔舒服，我就唔洗佢做灰伙子，俾佢做住睡王子先喇。

感謝天父。

DAY +164 老公病了

老公今天狀態很差，睡了一天仍然很累，有鼻水，連吃飯的力氣也欠缺。

 

下午探熱還是36.9，剛剛再探已升至37.1。按以往的經驗，很有機會會慢慢升高，發燒。萬一發燒便要入院了。

 

唔知會唔會有事呢？天父求你一如以往的繼續看顧老公。

DAY+162 i'M BaCK

我已經從青海回來了，雖然行程中間發生了小意外，亦有些阻滯，但總算平安回來了。

老公這幾天好像也不錯，除了仲係好眼瞓外，一切都可以。還長了很多新的頭髮。

天氣開始和暖，老公的狀態相信會一日比一日好。依家老公都會好乖的幫手洗衫掠衫、洗碗執屋，感覺他好像慢慢回復起來。老公成日投訴我見佢好似精神少少就勞役佢，但係郁下係好事黎既...所以大王已正式變為灰伙子(灰姑娘的男子版)，哈哈^^

跟大家分享一下青海的美麗風景~

DAY +154 出街食飯呵呵呵

自從可以心安理得的外出食飯，我家煮飯的次數已幾何級下跌，每日只維持有限度的煲湯。人總係有惰性，我不得不承認我是一個懶惰的人，最不喜歡的就是做家務。而老公可能已經食我煮既野食到悶，加上之前太多野唔食得，所以依家出街食飯都特別開心。我懶得開心，老公又食得開心，WIN WIN。

不過我地都明白要適可而止，而且不可掉以輕心，否則一陣又要入院留醫，就會冇啖好食，所以我地放肆多一陣就會收歛下。

4月21－24日，我要去青海工幹，所以要留底老公一個人喇，自老公患病以來，我出TRIP的次數大減，好耐未試過幾日見唔到老公，今次去4日，希望老公平平安安，而我又平平安安喇。

出TRIP 既日子，老公可以好自由咁四圍約人食飯喇，大家同佢出去食野既朋友仔，請幫手看住佢，唔好俾佢亂食野。不過我相信老公都係一個好自律既人，他會乖乖的。

大家復活節之後再見喇。唔知老公會唔會好似上次咁，再次仗義幫我打BLOG 呢。^^



提起懶惰人，想起箴言六章6至11節，跟大家分享下：

「懶惰人哪、你去察看螞蟻的動作、就可得智慧。螞蟻沒有元帥、沒有官長、沒有君王、尚且在夏天豫備食物、在收割時聚歛糧食。懶惰人哪、你要睡到幾時呢？你何時睡醒呢。再睡片時、打盹片時、抱著手躺臥片時、你的貧窮就必如強盜速來、你的缺乏彷彿拿兵器的人來到。」

DAY +149 Happy Farm 初收成

唔知大家仲記唔向 DAY +109我地分享過我地開始向屋苑平台既園藝區種植野呢？轉眼間就40日喇。

當時我地將格田劃分3小格，分別用黎種草莓、蕃茄同櫻桃蘿蔔，奶奶最後仲向佢果一格落左Ｄ白莧菜種子TIM。呢幾十日，大家翻土、播種、淋米水、落雞蛋殼、除草，依家終於有Ｄ收成喇。^^

我地種既4樣野，暫時得我既櫻桃蘿蔔成功發芽同長大，上星期六已經發現佢結左果，我當日摘左2個，好紅好得意，唔知佢地會唔會再大，所以其他O果D就再等下先再摘。



左邊那堆就是櫻桃蘿蔔喇～好多呢



呢粒係第一粒採摘的

暫時摘住2粒欣賞下

今日去淋水，見到佢地又長高左喇，相信Ｄ果又會大粒左。我地都唔係好肯定呢Ｄ蘿蔔仔係唔係可以煮黎食。唔知你地有冇人知道呢？

講完種植，都順便講下老公既近況。老公都幾好，只係成日都好眼訓，同埋有一日佢起身既時候，唔知點解對腳腫到豬腳咁，好似吹漲左。不過過左幾個鐘又正常返。估計係血液循環既問題，我會得閒留意下佢Ｄ腳，如果有咩唔妥，我會帶佢去睇醫生。好彩老公唔係真係章魚，如果唔係8隻腳一齊腫左都幾得人驚~

DAY +146 覆診非常順利-感謝天父

今日覆診非常順利，遲了起床，仍然可以排第二名，一切都順利，一時多便可離開，我下午仲可以趕返工^^

又等我匯報一下今日覆診的情況先～


驗血結果：小白 4.99，小色 9.2，小板 83，小中2.01。

醫生說是次結果不錯，可減輕丁咁多藥試下。另外，蛇已大致康復，而今次驗血亦再沒有發現巨細胞病毒，不用再吃巨細胞藥。

本身醫生建議3星期後覆診，但撞岩25/4及2/5 兩個星期一都是公眾假期，所以特准老公4個星期，即9/5 才覆診。不過醫生叮囑老公，有咩唔妥，記得自己去急症。（次次超過3星期覆診都會入急症室收場，希望今次唔會喇^^)

今日我鼓起勇氣問醫生，究竟老公可以出街食野未，醫生說唔係太過份，間唔中都可以，不過仍然唔好去人多的地方。哈哈。老公好開心，因為以後可以光明正大的在外邊食飯喇～

實在感謝天父每一天每一刻的保守。感謝天父！

DAY +144 感謝篇第一章

我和老公在教會參加的小組叫「主牽庭」。這個名是我們元老組員一起改既。「主牽庭」在2009年的春天成立，組員都是"新婚"夫婦。小組成立不久，由於大家都很願意付出，很投入，很開放自己的心，所以組員好快就已經很熟悉，很密切了。 感謝神！（這段主要是在主牽庭留言版抄的，只稍作修改^^。）

加入小組的時候，我同老公都仲未結婚，所以我地既婚齡係最短既一對（直到依家都仲係^^）。我地結婚既時候大家都有一起參加我地既婚禮呢。到依家「主牽庭」已人才仔仔，新舊組員打成一片，仲開始開枝散葉，多左好多小朋友，令我地個小組更有活力。

點解今日無喇喇會向度介紹「主牽庭」呢？因為自老公骨髓移植之後一直都冇返小組，尋日久休回歸，再一次跟大家同笑同哀，分享祈禱，感覺仍然一如以往般溫暖。亦都讓我回憶起好多好多跟組員一起的珍貴片段，特別是.....
-------------------------------------------------------------------
日期：2009年12月26日
地點：養和醫院
時間：下午晚上7時許

大家知道這天將會有檢查結果，組員們帶著詩歌，來到醫院陪伴我地。當日有好多好多人黎探老公，還未知道結果前，因人太多沒有地方，你們陪我到醫院走廊坐。你們當時的安慰及問候，是對我很大的支持。你們還跟我說，不用怕，萬一真係有咩事，我地全部人都會同你地一齊撐下去，有什麼需要隨傳隨到。唔知點解我最記得是說如果要人執屋就找姊妹，要捉蟑螂或者要整電腦就找弟兄，在徬徨中有點歡笑。

返回病房沒多久，大部份人都已走了，碰巧醫生來到病房宣判。簾子內的我、老公、老爺奶奶、細佬，聽到醫生的宣判，可能已有心理準備，大家看上去好像很平靜（但我相信是大家暫時未真正接受到）。打開簾子，看到你們傷心難過的表情，也看到你們有些人在偷偷的拭眼淚，大家都盡力扮作平靜。

醫生離開後，你們跟我們一起手牽手的在醫院唱詩歌。還記得初時大家都強忍著淚，直至剛生院BB的怡媽媽打電話來，一開聲就喊，大家都終於忍不住了，除了老公之外，大家都哭了，一面哭一面唱詩，再一起祈禱。

這難忘的一夜，多謝你們陪我地渡過了，能夠有弟兄姊妹一起同哭是多麼美的一件事呢。

-------------------------------------------------------------------------

那夜之後，你們對我們的支持從不間斷，在化療期間，你們差不多每晚都安排不同的組員山長水遠的到醫院為我們打氣，送上歡笑和安慰，你們真是可愛呢！

這個長期的作戰，有你們的咭、你們的MP3、你們的小禮物、你們的維他命C、你們的CD、你們的書、你們的陪伴、你們的禱告、你們的淚水、你們的笑聲令我們的日子易過了不少。

感謝天父為我們安排了這個小組，我們愛「主牽庭」、愛每一個組員、愛天父。感謝你們，老公依家有返一點力氣了，我們休養生息那麼久，相信也可以慢慢回歸，繼續跟大家一起發揚「主牽庭」的組訓　－　＂樂要分享、禍要分擔、互愛、互勉＂

這是感謝篇第一章。因為除了要多謝小組外，還有無數咁多人要感謝，要數都要很多很多章才數完。我希望之後有機會可以一一記下，因為這些都是神安排給我們的天使，我們希望可一一數算神的恩典。感謝天父！

DAY +140 作反日大揭秘

老公這幾天不錯，蛇蛇已將近全部退去，只係可能唔係好夠血，加上天陰陰，所以成日都想瞓。

在聰明人節，我地去左大作反，見作左反幾日都冇事，所以斗膽同大家分享一下我地大作反日既活動花絮，請看以下的短片，睇下我地去左邊喇～

短片入面既地方向好耐好耐，耐到老公都未發病之前，老公已經叫我同佢去。只係我呢個冇咩童真既人，每次都同佢講，果度好悶ga，唔岩你去。拖拖下一直都冇同佢去過。直至佢發病之後，有一日佢話，成世人都未去過。當時我真係好後悔一直都唔肯陪佢去，所以向2010年1月30日，我地就一齊去左第一次。老公o果日好開心呀，好似個大細路咁。可能因為入面真係好有歡樂既氣氛，令人可以暫時忘憂，而老公亦都可以暫時忘記自己係一個病人。自果次之後，我就應承老公每次佢化療完畢，放監回家既時候都會同佢去一次。

過去一年我地去左7次，真係估唔到我都會一年去7次，我地張全年通行證真係抵。當日做證既時侯，老公仲話如果做完張證冇幾耐就返左天家，咁就蝕哂。哈哈，依家張證到左期喇，老公我地唔洗蝕lu!

呢次去完，離開既時候老公好似好唔捨得，唔知佢係唔係驚張通行證到左期之後，我唔會再同佢去呢？老公唔洗擔心喇，你以後要去，我一定會陪你再去ga!^^ 我只會跟你一起去睇入面既煙花~

我地成日都會為左身邊一Ｄ好似好重要既事，例如工作，追電視劇，而忽略左一D更加重要既人同事。為左唔好令愛得太遲，我地要留多Ｄ時間俾身邊既人同埋天父啊～

DAY +136 作反的一天

哈哈哈.....新版面係唔係好搶眼呢?

今日我地計劃作大反.....我地會做咩...唔話俾大家知住.....

今日係聰明人節, 祝大家開開心心:-)

DAY +134 蛇未退 家照返^^

覆診順利, 兩星期覆診.
3小時後才有藥拎, 去數碼港食個飯再回來:-)

覆診真的令人很累，雖然跟老公忙裡偷閒去左數碼港偷吃了午飯，但舟車勞動真的磨滅了我們的精神，仲有D暈車浪。回到家兩個人就陷入昏迷，到九點先再起身煮野食。

等我匯報一下今日見醫生短短3分鐘醫生講左咩喇。

驗血結果：小白 4.8，小色 9.3，小板 77，小中未知。

醫生話跌左D喇，再觀察下。另外，有發現巨細胞病毒Cytomegalovirus CMV，以防萬一，開左D巨細胞藥老公食。

至於蛇蛇，醫生就免役力低都唔會咁快好，小心Ｄ水泡，如有蔓延就要自己去急症室，唔洗老公住院。

我問醫生老公幾時要抽骨髓驗下，醫生話都只係換左4個月，唔洗咁快抽，遲下先WOO。

認識巨細胞病毒
巨細胞病毒(Cytomegalovirus, CMV)是一種常見的病毒，它可感染各年齡層的人，甚至包括未出生的嬰兒。雖然可以透過藥物預防及治療，但一旦感染CMV之後，無法完全清除病毒，並終身停留在體內。雖然日常生活中很難避免感染CMV，但仍有一些方法可以減輕危險，以下將詳細介紹之。

什麼是巨細胞病毒？

巨細胞病毒(CMV)屬於人類疱疹病毒(HHV)的第5型，因此又稱為HHV5，會導致水痘、帶狀疱疹和口唇疱疹。在美國感染人數相當多。大多數情況下，CMV並不會導致疾病，但當免疫系統缺損時，CMV會導致嚴重的疾病，包括失明和死亡，對未出生的嬰兒也可能導致失明和智能遲緩。

如何知道是否有巨細胞病毒感染？

初感染時並沒有明顯症狀，有些人會有疲倦、腺體腫大、發燒和喉嚨痛等症狀，因為類似感冒，大多數人不會認為自己已經感染CMV。 有許多方法可以檢測CMV，包括血液或尿液培養、抽血檢查或採身體組織樣本。如果檢測結果為陽性表示你已經感染，但可能沒有任何症狀。

如何預防巨細胞病毒的疾病？

感染CMV和CMV發病之間是有區別的，CMV感染者並不一定會發病，除非其CD4相當低，此時可以靠藥物(如Cytovene)幫助抑制病毒。因此，對感染者來說，最好的預防方法就是保護您的免疫系統，接受藥物治療，維持CD4在200以上。當CD4細胞低於50時，感染者出現CMV疾病的危險性會增加。

CMV導致的疾病相當多，最常見的部位是眼睛，導致巨細胞病毒性視網膜炎，建議每3-6個月找有經驗的眼科醫師為你做檢查。

可以停止CMV發病的預防投藥嗎？

可以的，只要CD4在100-150間，且保持6個月以上，如果CD4又掉了下來，就必需再開始CMV的治療，建議你與你的醫生討論用藥的決定。

如何知道是否有巨細胞病毒疾病？

通常CD4數低於50時CMV會發病，可以藉由抽血檢測，如果你有以下症狀，建議盡快告知你的醫生。

1.眼睛病變：最常見是病毒性視網膜炎或損壞視網膜。

2.結腸病變：巨細胞病毒腸炎，症狀包括腹瀉、體重減輕、食慾不振、腹部或胸部疼痛、便血和發燒。這些症狀和其他腸胃道感染的症狀很像，因此通常不容易很快就檢測出來。巨細胞病毒也可能影響上腸胃道，引起巨細胞病毒性胃炎。

3.腦和神經病變：巨細胞病毒會引起腦炎。症狀包括頭暈、頭痛、癲癇發作、人格改變及神經系統的問題，可能在數週或數月後死亡。當CMV病毒感染神經系統，稱為多發性神經病變，症狀包括麻木、疼痛、肌肉無力、大小便失禁，症狀看起來像其他伺機性感染，因此容易被忽略。

4.咽喉病變：引起咽喉炎，導致吞嚥困難、胸痛、發燒、口部潰瘍和打嗝。

5.新生兒疾病 ：先天性巨細胞病毒是最常見的新生兒感染，將近1/10的嬰兒出生時症狀是紅疹、體重過低、小頭、黃疸、肝脾腫大，出生前3週必須檢測是否感染。

如何治療巨細胞病毒的疾病？

分兩個階段：初始治療和維持治療。症狀出現到2-3週為初始治療，之後則是維持療法，防止病毒造成疾病。

資料來源：http://www.thebody.com/content/treat/art4979.html

DAY +132 覆診改期

原本今天是覆診日，但因為醫生今天有事不能看門診所以改到星期三。

天父永遠都為我們配合最好的時間。

因過去的星期六日，原本我要到國內探訪學生，由於老公入院，所以同事代我上去（雖然同事唔會睇到個BLOG，但都在此多謝他們為我提供彈性)，今天他們都補假休息。所以要是今天要覆診，也是夾硬要公司關門一天（心裡有點不好意思）。正當我又好想同老公去覆診又唔想妨礙公司運作及同事休息之時，護士就打電話來說覆診改為星期三，你說天父是多麼細心週到呢，哈哈。

老公這幾天蛇蛇好像已停止蔓延，仍是維持繞身半圈，開始起水泡，間中有點痛，但不算劇痛，感謝天父。

過去的週末，與好友及家人見見面，附近閒逛，淋淋花，懶洋洋，過得很開心。

DAY +128 忽來也忽去

忽然入院，又忽然出院。

拉哥（主診醫生）說可把吊藥轉為口服藥，放老公回家。因為在醫院也不太好。下星期一覆診。

YEAH~ 返屋企LU~

DAY +127 皮膚排斥

老公入院第三天，昨天收到補給品，終於可上網同為電話充電，能夠定時匯報情況。

醫生每日都會來看老公兩次，每次都會淡淡的說說老公的情況。醫生說老公面腫等情況，很大機會是皮膚排斥，現加重一些抗排斥藥，希望會有改善。至於蛇蛇，開始現出蛇形，現在已繞了近半個圈，仲紅左好多。老公說不太痕，只是間中有Ｄ痛，未有劇痛。繼續落治蛇藥。

老公唔知係唔係打左藥，所以成日好眼瞓，瞓下一日瞓下又一日，日子都易過D，他胃口心情都OK，日日食葉爸送來的葉媽靚飯。感謝天父的保守。願老公平安。

蛇蛇令我想起創世記第三章。

3:1		耶 和 華 　 神 所 造 的 、 惟 有 蛇 比 田 野 一 切 的 活 物 更 狡 猾 。 蛇 對 女 人 說 、 　 神 豈 是 真 說 、 不 許 你 們 喫 園 中 所 有 樹 上 的 果 子 麼 。
3:2		女 人 對 蛇 說 、 園 中 樹 上 的 果 子 我 們 可 以 喫 ．
3:3		惟 有 園 當 中 那 棵 樹 上 的 果 子 、 　 神 曾 說 、 你 們 不 可 喫 、 也 不 可 摸 、 免 得 你 們 死 。
3:4		蛇 對 女 人 說 、 你 們 不 一 定 死 、
3:5		因 為 　 神 知 道 、 你 們 喫 的 日 子 眼 睛 就 明 亮 了 、 你 們 便 如 　 神 能 知 道 善 惡 。
3:6		於 是 女 人 見 那 棵 樹 的 果 子 好 作 食 物 、 也 悅 人 的 眼 目 、 且 是 可 喜 愛 的 、 能 使 人 有 智 慧 、 就 摘 下 果 子 來 喫 了 ． 又 給 他 丈 夫 、 他 丈 夫 也 喫 了 。
3:7		他 們 二 人 的 眼 睛 就 明 亮 了 、 纔 知 道 自 己 是 赤 身 露 體 、 便 拿 無 花 果 樹 的 葉 子 、 為 自 己 編 作 裙 子 。
3:8		天 起 了 涼 風 、 耶 和 華 　 神 在 園 中 行 走 。 那 人 和 他 妻 子 聽 見 　 神 的 聲 音 、 就 藏 在 園 裡 的 樹 木 中 、 躲 避 耶 和 華 　 神 的 面 。
3:9		耶 和 華 　 神 呼 喚 那 人 、 對 他 說 、 你 在 那 裡 。
3:10		他 說 、 我 在 園 中 聽 見 你 的 聲 音 、 我 就 害 怕 、 因 為 我 赤 身 露 體 ． 我 便 藏 了 。
3:11		耶 和 華 說 、 誰 告 訴 你 赤 身 露 體 呢 、 莫 非 你 喫 了 我 吩 咐 你 不 可 喫 的 那 樹 上 的 果 子 麼 。
3:12		那 人 說 、 你 所 賜 給 我 、 與 我 同 居 的 女 人 、 他 把 那 樹 上 的 果 子 給 我 、 我 就 喫 了 。
3:13		耶 和 華 　 神 對 女 人 說 、 你 作 的 是 甚 麼 事 呢 。 女 人 說 、 那 蛇 引 誘 我 、 我 就 喫 了 。
3:14		耶 和 華 　 神 對 蛇 說 、 你 既 作 了 這 事 、 就 必 受 咒 詛 、 比 一 切 的 牲 畜 野 獸 更 甚 、 你 必 用 肚 子 行 走 、 終 身 喫 土 。
3:15		我 又 要 叫 你 和 女 人 彼 此 為 仇 、 你 的 後 裔 和 女 人 的 後 裔 、 也 彼 此 為 仇 ． 女 人 的 後 裔 要 傷 你 的 頭 、 你 要 傷 他 的 腳 跟 。
3:16		又 對 女 人 說 、 我 必 多 多 加 增 你 懷 胎 的 苦 楚 、 你 生 產 兒 女 必 多 受 苦 楚 ． 你 必 戀 慕 你 丈 夫 、 你 丈 夫 必 管 轄 你 。
3:17		又 對 亞 當 說 、 你 既 聽 從 妻 子 的 話 、 喫 了 我 所 吩 咐 你 不 可 喫 的 那 樹 上 的 果 子 、 地 必 為 你 的 緣 故 受 咒 詛 ． 你 必 終 身 勞 苦 、 纔 能 從 地 裡 得 喫 的 。
3:18		地 必 給 你 長 出 荊 棘 和 蒺 藜 來 、 你 也 要 喫 田 間 的 菜 蔬 。
3:19		你 必 汗 流 滿 面 纔 得 糊 口 、 直 到 你 歸 了 土 、 因 為 你 是 從 土 而 出 的 ． 你 本 是 塵 土 、 仍 要 歸 於 塵 土 。
3:20		亞 當 給 他 妻 子 起 名 叫 夏 娃 、 因 為 他 是 眾 生 之 母 。
3:21		耶 和 華 　 神 為 亞 當 和 他 妻 子 用 皮 子 作 衣 服 、 給 他 們 穿 。
3:22		耶 和 華 　 神 說 、 那 人 已 經 與 我 們 相 似 、 能 知 道 善 惡 ． 現 在 恐 怕 他 伸 手 又 摘 生 命 樹 的 果 子 喫 、 就 永 遠 活 著 ．
3:23		耶 和 華 　 神 便 打 發 他 出 伊 甸 園 去 、 耕 種 他 所 自 出 之 土 。
3:24		於 是 把 他 趕 出 去 了 ． 又 在 伊 甸 園 的 東 邊 安 設 基 路 伯 、 和 四 面 轉 動 發 火 焰 的 劍 、 要 把 守 生 命 樹 的 道 路 。

Day +125 再度入院 - 與蛇搏鬥

12:00 今天覆診，醫生發現老公生蛇，現即時安排老公入院。正安排中。

22:00 老公已經入左院安頓好喇，呢次突然入院令我地有Ｄ措手不及。原本我仲諗上次3個星期先覆診，今次會唔會可以一個月先覆呢，點知我太貪心了。

原本今日覆診主要想問下醫生老公塊面又紅又腫又生粒粒既問題，點知問問下，就講到尋晚發現右胸口都有敏感既情況。醫生一睇，就話佢唔係敏感，係生蛇。生蛇要即係入院治蛇，至於塊面，醫生都唔得閒理，總之要立即治蛇先WOO。

至於驗血報告亦黎一個大倒退，強差人意，小板暴跌40%至66，而其他分別是：小白5.03、小色 9.7、小中1.78。醫生只說D指數比較飄忽，唔係咁好，不過睇定Ｄ先。

我仲以為生蛇係好普通既事，點知對於血癌病人黎講原來都幾大件事，老公被發現生蛇後，立即要同其他病友隔離，護士仲話，下次有咁既情況要第一時間通知，唔係一個傳一個會好大鑊。今次真係對唔住，我真係唔知老公係生蛇，希望冇人被傳染喇。

老公依家入返上次個難民營，不過今次老公Ｄ小白冇上次咁低，感覺上難民營都幾安全。老公最少要住5天，每8小時吊一次治蛇藥同8支唔知咩蛋白。

雖然入院入得急左D，但係都感謝天父，向老公Ｄ蛇毒未係好勁，未開始感到刺痛、灼熱、起水前已經被發現，唔會俾蛇作惡。

希望蛇蛇乖乖地離開，敏感排斥都唔好發生，老公在病房平平安安，唔好再生事端，快快康復，快快回家～


生蛇FAQ
文章日期：2008年7月7日
【明報專訊】Q﹕什麼是「生蛇」？為何分佈呈帶狀？

A﹕「生蛇」即帶狀疹，是由水痘帶狀疹病毒（varicella zoster virus）引起，曾出水痘人士，體內殘留病毒，當身體抵抗力變弱時，便有可能再發病，病毒會沿身體其一神經線在皮膚上蔓延，故呈帶狀。

Q﹕哪些屬生蛇高危群？
A﹕免疫力低、長者、腎病及糖尿病患者、血癌或進行化療的癌症患者均有較大生蛇風險，此外壓力大、睡眠不足者亦屬高危。

Q﹕生蛇病徵如何？多久才痊癒？
A﹕生蛇位置會有刺痛、灼熱、痕癢及出疹，患處有嚴重赤痛或觸電感覺，紅疹水會增加，漸漸破裂、變乾及結痂，兩三周後痂會脫落，皮膚便會癒合。

Q﹕生蛇至圍身體「一個圈」便會致命？
A﹕生蛇通常只會在身體一邊，若兩邊也生蛇，甚至連成一圈，顯示身體抵抗力已很弱，可能本身患有癌症等問題，故也有生命危險。

資料來源﹕
皮膚科專科醫生陳衍里、麻醉科專科醫生李靜芬

DAY +120

今日係第120日喇

老公食左敏感藥，塊面因為敏感而發的紅已退了，只係有Ｄ腫腫地，應該可以等到下星期一覆診回去找醫生的。^^

天氣開始冷，自星期一起老公再次乖乖的在家繼續家居隔離的生活，沒有外出，也沒有在外面吃飯。感謝天父的看顧，之前稍為放肆的偷雞生活沒有帶來什麼大問題，希望快Ｄ可以堂堂正正的上街，堂堂正正的在外邊大吃大喝，堂堂正正的去之前老公在院期間搜羅的我最喜愛10大食店吃吃吃。

DAY +117 腫的情況未有改善

上星期四，終於忍不住打返瑪麗自首，護士說臉腫眼痕有很多可能性，叫我們即刻去睇急症。

到了星期五，最後老公也投降去將軍澳醫院睇急症，因為他真的很腫，而且眼很痕。

除了瑪麗醫院急症室對血癌病人處平常心外，大部份醫院一聽到到診者患有血癌都會特別照顧。在急症室很快便到老公，醫生還質疑護士為什麼不安排老公在隔離病房等候，並多次指出老公不應該／不可以在急症室大堂逗留。

說回正題，醫生看過老公的情況，說因之前沒有見過老公，唔知老公腫既程度有多大，並表示未有紅，應該不算大問題，開了眼藥水及敏感藥我們便特別安排我們真接DISCHARGE，不用到大堂再等。

就係咁我地就回家去了。

至今日，腫及痕的情況未有改善，甚至嚴重了，還波及頸部。今日發現老公的頸上出了很多像蚊子咬的粒粒。

不過老公除了腫左、紅左及出粒粒外，人還算精神，昨晚還跟幾個老友偷雞（依家都唔係偷，是明目張膽的違規）出左街。

見老公精神OK，我也不太擔心，希望21/3覆診前也不要惡化喇。

DAY +112 狀況起伏

老公這幾天狀態有點回落了。

他的面又腫，眼又腫，成日瞓都覺得好攰，少了活力，還說頭痛。連跟我到樓下淋泥既精神也欠奉。

原本想話打返醫院自首，但老公說再觀察下先WOO.

希望唔係咩大排斥喇~

DAY +109 Happy Farm



鄰居的作品...最右邊那個2個月就種到咁高...勁!

整裝待發



我們的土壤

 我地住既屋苑，向平台劃左一D區域俾住戶種植。一直都有意想申請一格同老公一齊種。11月當老公岩岩預備移植既時候，又到一年一度申請既日子，我填左表申請，果時老公仲話申請到，到時可能都係得你自己去種。-_-...(冷水怪)

12月收到信話今次抽唔中，候補名單13。一直以為今年都冇咩機會，加上o果時都好忙，將呢年事忘記左lu。

尋日管理處打黎話有格田問我地要唔要，哈哈，雖然遲左2個月收地，但係梗係要喇^^ (早2個月俾我，我都冇閒情逸緻去種喇，時間真係岩岩好）

為左增添是次種植既趣味性，我地決定將格田再劃分3小格，進行種植比賽。一格由老公用黎種草莓，一格由葉爸葉媽用黎種蕃茄，剩番一格就由我用黎種櫻桃蘿蔔。睇下邊格成功種出植物同收成。

其實我地對種植都係毫無經驗，本身我建議移植一d小植物入去格田度再種大佢既，不過都公話聽到移植就驚，話唔准移植，要慢慢睇住ｄ種子發芽成長woo，希望我地成功喇^^

同我們住同一個屋苑既鄰居（好似送蛋糕黎既姐夫同我既同學兼鄰居)得閒可以去我地格田到探下小植物，我地係C1果一格。

HAPPY FARMING~

DAY +108 我們很快樂

這幾天雖然有一些小插曲，但係一切都化險為夷。我們繼續好開心咁過每一天。

老公身體暫時好了一點，依家開始佢自己自己整早餐俾自己食，仲做家務TIM。尋日老公仲早過我起身，煮早餐俾我食，是有史以來首次食到老公煮既早餐，多謝老公。

其實老公過左一百日，仍要在家居隔離一段時間，不過都按捺不住，間中都偷雞去行街，又偷雞去可信賴既餐廳食自己認為可信賴既焗飯。偷食可能特別好食，又或者因為太耐冇食過，老公食得好知味又會食得特別多。亦感謝天父潔淨食物，暫時都冇事。我地都唔會好過份，食過就已經好滿足。

好多時，見到有些病友的網誌，寫寫下冇再UPDATE，我地就會好擔心，佢會唔會有咩事呢？所以我地一定會定期UPDATE下等大家都知道我們安好。^^

DAY +104 疲憊的覆診

返瑪麗覆診的一天，又是打仗的一天。雖然來到今天可以有機會覆診是很值得感恩，但每次的覆診也是身心的一個大考驗，真的累透了。辛勞疲憊的一天，也有一個好消息來消疲。

心情的起落
早上第一個到達(06:14分到)，第一個簽名，老公仲好勁咁發現J8個電視原來係有高清，惠澤社群（過去個個星期大家都係睇雪花翡翠台）。為覆診日有一個好開始，我們忘記了4時多起床的疲倦，感到很開心，心情一直高漲了5小時。

中午為著護士的不合理安排，臨門一腳我們錯過了早上見醫生的機會，盼望見醫生盼了7小時，卻看著病友一個個離開，最後醫生也離開病房。我們忘了今早曾經有的喜悅，餓餓的累累的戰戰兢兢的繼續呆坐（坦白說由第一淪為包尾心中有一點憤怒）。

下午為著驗血的結果，我們歡喜快樂。再等了2小時，醫生開完會帶著麵包回來（醫生也忙得沒有坐下來吃飯的時間，真陰功！）終於可以同醫生對話了。

喜悅的消息
1. 過去一年，最好的驗血報告：小白5.21 小色 10.3 小板 110 (首次有3位數^^)  小中 2.47
    除了小色及小板未合格之外，其他也有顯著升幅。
2. 不用輸血、不用打小白針
3. 部份要到醫院吊／吸的藥可改為口服，不用一星期番幾次東區醫院
4. 可減藥，不用服鎂丸，環胞素由每日200mg，減到180mg
5. 三星期之後先再覆診

見醫生不夠3分鐘，聽到的卻全是令人震奮的消息，我們忘了等候9小時的無奈，換了百倍的喜悅。再一次學習到，在不如意的時候也要學習忍耐，保持心情平靜，沒有9小時的醞釀，沒有9小時後的瘋狂喜悅。天父謝謝袮。

喜悅的心情持續了一段時間，再等了1.5小時取藥，在瑪麗醫院逗留了10多個小時，最後我們帶著開心的心情同疲憊的身軀回家。返到屋企既時候大概係5點，剛好是今早出發的時間，吃了點東西，我們就去瞓覺了。

醒來的時候上看到鐘上面寫著7:15，誤以為是早上，還想預備返工，把過去12小時發生的事變成了夢境。還好定定神，發現一切不是夢。感謝天父。

老公放21日假，21日不用踏足醫院，ＹＥＡＨ！

DAY +103 宣道會油塘堂生日快樂~

今日是宣道會油塘堂8周年堂慶既日子，先祝油塘堂生日快樂！並祝教會繼續繁盛，各位弟兄姊妹都一起靈命日長。

今日好開心，老公偷雞外出（半年家居隔離係唔可以四圍去的），跟我一起去到小學禮堂跟大家一起參加八周年感恩崇拜，多謝弟兄幫我地安排，又車我地去。真係好好好開心，好耐冇試過同老公一齊返崇拜，好耐冇試過拖住老公一起唱詩歌。曾經想過可能今生再沒有機會跟老公一起做的事，今日都再次做到，好感恩，將榮耀頌讚都歸與我們的父神。

今日亦很高興聽到CLARE姊妹既見證，以及聽到弟兄姊妹為宣教所創作既歌曲，好好聽，好ENJOY!

老公今日都好開心，而且即使早起仍然有精神！

今日下晝仲有2兩位跟我一起長大既姊妹黎我屋企，專登整老公一直好想食，又唔可以出街食，我又唔洗整既心太軟蛋糕同意大利飯俾我地食，仲帶埋靚靚禮物同薯片黎添。

難過的日子有大家一起，常常送來溫暖、幫忙同禱告，我地真係受寵若驚，感謝天父賜予我們身邊這些天使，天父多謝袮的看顧及愛鍚，多謝袮！

詩歌分享：神坐著為王
http://il.youtube.com/watch?v=EOlsDeRCL1Q

神啊！我要一心稱謝你，
神啊！我要高舉你聖名，
我要因你歡喜快樂，至高的主啊，
你榮耀使我心歌頌你？(x2)
驅黑暗，留住美，藉著神重拾愛；
齊心禱告以真誠，藉主跨勝！
要頌揚神是愛，要頌揚神是美，
燃點真愛發光芒，宣告我主坐著為王。
就算翻起千般駭浪，主必會為我掌舵，
每日隨時乘風破浪，樂道主的凱歌！
要頌揚神是愛，要頌揚神是美，
燃點真愛發光芒，宣告我主坐著為王。



即焗即食心太軟　－　好味道！

 

自家製磨菇意大利飯 - 好食!



靚靚碗碟 - 多謝SINDY

 

補補殘樣的姻脂 - 多謝KATRIE

DAY +100

今日是移植後第100日，感謝天父的拖帶，感謝大家的愛護。剛才22:25發生了一件驚喜事件。當我在吃公仔面，老公在喝湯既時候，突然間門鐘響起。平時都唔會有人呢個時候黎，而且黎既話樓下嚴密既保安一定會通知我地架。究竟係邊個呢?

當我同老公開門既時候，見到一個斯文靚仔有型既陌生人，拎住一盒蛋糕。我碌大對眼望住佢，謎底終於揭開。原來佢是主牽庭小組其中一名組員既姐夫，他是應主牽庭既要求來做蛋糕大使，送蛋糕來賀老公+100日。姐夫仲用溫柔的聲線說：＂知道你出院，請你地慢慢享用，願主祝福你地。＂唔該哂姐夫～你真係好得！

多謝各組員的祝福同心意，好SWEET A~鍚哂你地!

DAY +100 蛋糕~

DAY +95, 96, 97 不用到瑪麗的星期一

今天星期一，老公形容是大赦日，獲拉哥（主診醫生）恩准豁免到瑪麗覆診一次。真係可喜可賀。唔洗去瑪麗，唔洗早起身，唔洗一早找的士，唔洗趕簽名，唔洗等抽血、量血壓、打藥、見醫生、拎覆診紙同等拎藥。最重要係唔洗等驗血結果，唔洗有那種等候判刑既感覺。

數數下，唔洗覆診好似好多好處好開心咁，但又想想，不知有多少人渴望可以換完骨髓去覆診卻等不到。今天我們可以早起身，一早找的士，趕去簽名，等抽血、量血壓、打藥、見醫生、拎覆診紙同拎藥。仲可以有生命的氣息，有感覺去等驗血結果，去為睇驗血報告而擔心，是一件多值得感恩既事呢！

老公精神回服了少去，他說之前瞓極都好眼瞓，又好難集中精神，但係依家開始瞓完都有精神既感覺（雖然精神的時間不是很長），還可以開始看書。自老公患病以來，最多人送。借給我們的就是書，好多好多既書。原本諗全老公成日向醫院可以睇下睇下睇哂，點知咁耐都只係完成左一本，我想要睇哂呢Ｄ書都有一段長時間，哈哈。

各位弟兄姊妹，如果你地借左書俾我地而有又需要用，唔好客氣，可先問我們取回，下次再借給我們，若要等我們看完，不知何時才可歸還呢。

仲有3日就100日，好開心呢！

DAY + 93, 94 人月兩團圓

昨日日農歷1月15日的元宵佳節，老公一早就去了東區醫院吊藥，由於我的假期已冇多，所以去東區吊藥呢Ｄ簡單的覆診，我就冇陪老公去了，老公好叻，一個人揹住支都重重地既玻璃水去醫院，又一個人返屋企都冇問題，勁！

昨日咁岩又到我隻腳覆診（上年左腳做了小手術，所以要覆診），下午去了將軍澳醫院，五點鐘到就走得，好快就同老公一齊返到屋企喇。忙裡偷閒，返到屋企爭取時間午睡了。原本叫老公7點半叫醒我起身煮晚飯，點知老公見我瞓得咁開心，唔想叫醒我，到我醒既時候已經係8點幾喇，餓親老公TIM。冇喇喇星期四可以瞓晏覺，覺得好似中左獎咁開心，但我將我既開心建築左向老公肚餓上面，真係唔好意思喇。

可以同老公簡簡單單的食餐晚飯，之後靜靜的一起坐向梳化睇電視，我覺得好開心呀！人月兩團圓的元宵節過得很好，希望老公都覺得係喇。

DAY + 91, 92 迎接DAY +100

數數手指，下星期四就是DAY +100。即係渡過了急性排斥期。雖然護士說DAY +100只是一個參考日子，並不代表人人都是100日後就不會出現急性排斥出現，但係重生100日也是一個大日子吧。

渡過了急性排斥期，下一個目標是什麼呢？我想會是安然渡過家居隔離的半年吧，即係安然渡過DAY +180，以及減少接受移植後的一百天後有機會發生的慢性排斥。由DAY -10 開始數到今天DAY +92，真係開心，多謝大家陪我們一起數算日子，數算主恩。

本來DAY +100應該攪返個百日宴賀下佢既，很可惜那天我又要開會，所以慶祝活動要推遲一天了。

知多一點點：

移植體與宿主組織抗原型有差異，可觸發免痠反應:

􀂾 急性排斥: 接受移植後的一百天內發生。

階段	皮膚	肝	腸
1	丘疹性發疹<25%皮膚表面	膽紅素34~51mmol/l	肚瀉500~1000ml/日
2	丘疹性發疹<25~50%皮膚表面	膽紅素51~102mmol/l	肚瀉1000~1500ml/日
3	全身性紅皮病	膽紅素102~256mmol/l	肚瀉>1500ml/日
4	落痂發皰疹	膽紅素>256mmol/l	腸病彧吐糞症

􀂾 慢性排斥: 接受移植後的一百天後發生。

- 皮膚 : 硬化、不均稱、鱗片狀、紅皮病、去色、指甲萎縮、脫髮.

- 外分泌腺 : 乾燥綜合症引致吸收不良、眼球損壞、眼水乾.

- 胃與腸的通道 : 黏膜潰瘍、扁平苔蘚、胰臟失調、營養不良、體重減輕.

- 肺 : 限制性或阻塞性支氣管疾病、再發性胸部感染、自發性氣胸.

- 肝 : 內肝膽管閉塞、肝硬化肝衰竭.

- 肌肉及骨絡 : 關節不靈活影響動作、面鞘收縮、肢體缺血.

- 免疫系統 : 淋巴萎縮及失去脾臟功能、由真菌、病毒引起的持續性感染.

- 骨髓 : 因為自體免疫系統的破壞及骨髓減少生產而引致持續性血小板的減少.

資料來源: http://www.bmtpa.org.hk/documents/events/2006/20060527/20060527.pdf