Day+3287 9歲爸爸

今日係一年一度的住院節紀念日翌日，上嚟發現原來自2016年後都無更新。明明我地年年都有紀念 點解會無更新呢? 

點解呢? 點解呢?

諗到喇....係因為天父恩典太豐富，實在像恩雨延綿不斷臨到我家，自2015家庭成員由二變三,  2017, 2018分別再加入新成員，令到呢個章魚家庭翻倍。唔止章魚先生由灰火子變做灰爸爸，我也要變左做灰媽媽，每日疲於奔命照顧串燒三兄弟。還要動員四大長老及姨媽s 一齊幫手。哈哈，哈哈，每日忙到氹氹轉。

當然忙，但忙得嚟係超開心既，發夢都無諗過會有呢日，能夠有心有力湊仔都是滿有恩典的，感謝主,我哋將繼續依靠天父看顧及帶領，盡力照顧好天父給我倆既產業。

今日堂慶16周年，大哥同二哥有幸可上台獻詩讚美主，藉此分享這詩歌給各位，盼望大家也感受到天父的愛^^

活出愛

有一份愛，從天而來，
比山高，比海深
猜不透，摸不著，卻看得見
因為有你，因為有我，
甘心給，用心愛
把心中這一份愛，活出來

耶穌的愛激勵我，敞開我的生命
讓自己成為別人祝福
耶穌的愛點燃我，心中熊熊愛火
我們一起向世界，活出愛

點解3年無update 呢, 其實唔係因為照顧小孩忙到唔記得，係前兩年打完想post時系統出錯post 唔到，唔知今次成唔成功呢?

Day +2191 6歲爸爸

爸爸6歲了, 恩霖也快15個月大. 感恩過去一年忙碌中一家人仍齊齊整整, 平平安安, 感謝天父!

恩霖今年開始也有份食菠蘿腸呢, 日後會讓他明白菠蘿腸的意義, 同心感恩. 

DAY +1826 ＜老公住院節紀念日＞ - 5 歲了！

五歲喇！

熱烈祝賀老公五歲生日！

轉眼又一年，老公原本愈來愈肥...  但呢幾個月體重不斷下跌，長期精神不滯....  事緣唔係因為病，而係因為一個人...

↑ 呢個人就係小章魚喇....感謝天父，我倆嘅小章魚於本年度8月26日臨到...... 小章魚的加入，令家中充滿生氣，佢不屈不撓嘅哭聲，加上力爭上游嘅動力，令到我哋對佢「愛」不釋手，晚晚陪佢開PARTY，哈哈哈...

我哋幫小章魚命名為「恩霖」，藉以記念天父的恩典如久下不停的雨一直潤澤我們一家人。希望恩霖日後會懂得愛主愛人，學習到無私服侍有需要的人，把主耶穌的愛傳開去。

5 年前的今日，又如何能想像現在的光景呢？一切全是恩典....
盼望老公能有健康的體魄，能夠與我一起見證恩霖成長的每一時刻。

今年繼續以「菠蘿腸」為記，往後會把呢個傳統承傳予恩霖，讓我們的家不忘上帝的恩典。

祝福各位!

DAY +1461 ＜老公住院節紀念日＞ - 4 歲了！+【特別鳴謝】

4歲喇~~4歲喇~~

點解稱身的衣裳
現在已都穿不上
傢俬變得那麼小
門也沒法穿過了
天天長大我天天高 (睇下邊個高D)
LaLaLaLaLaLaLaLaLaLa...
(XXX廣告歌)

老公4歲喇，佢D衣裳都仍然穿得上，傢俬沒有變得小，門都仍然穿得過，高度都仍然係咁高，嘻嘻 =P

唯一最大的改變就係變咗老老老老公。見到老公老咗我好開心，因為老公能夠陪我一齊老咗，一齊肥咗(我高速，佢龜速^^)，一齊出皺紋白頭髮(我指未來)，唔係一個人孤獨地老 =)。

過去一年，我哋嘅生活是平靜安穩，很感恩可以用呢4個字去總結過去一年的日子，感覺十分幸福。

【特別鳴謝】

藉著這個日子，也想向當年捐骨髓俾老公嘅「有心人」再次道謝。沒有當日有心人的無私奉獻，今天很可能就只剩我一人孤伶伶的。有點可惜的是，事隔多年，老公最終未能透過紅十字會的安排與捐贈者相認，故我們沒法親自多謝他。無論如何，如果「有心人」有緣看到這個 blog，就讓我們在此向你說聲真誠的感謝！



Day +1096 ＜老公住院節紀念日＞ - 3 歲了！

好耐冇打 BLOG，突然唔係好識打添。以前點解可以打到咁多嘢嘅呢？！ 真係勁！(唔知醜=P)

講返正題先....老公，生日快樂！

今日係 DAY +1096.... 感謝主！

一如往年，我地繼續承接住院節紀念既指定活動，以菠蘿腸、營養奶為記，記念老公進行骨髓移植嘅大日子，數算神恩！

唔知係唔係年紀大咗，記性差咗，都唔係好記得3年前嘅事，不過睇返呢個 BLOG，一幕幕嘅情景似遠還近的浮現，當時唔係憑天父賜予的力量同大家既支持，都唔知點撐過，實在是極為奇妙。

今年一月老公已返回東區醫院覆診，見返 D 醫生護士好有家嘅感覺，每次覆診都有申請續期嘅感覺，雖然當中都出現過 D 不正常指數，但總算安穩，暫時都成功續期，3個月3個月咁又過咗一年，嘻嘻！

天父真好，從未離開我們，更為我們預備最好的，我地嘅生活繼續平淡是福，知足常樂。

過去一年老公除左被迫要做多D家務外，生活都冇咩改變，人就肥咗D，不過都仲係未達標。

我既轉變就大DD，除左身體狀況差咗DD，以及肥咗DD變咗肥師奶之外，我依依不捨咁離開做咗9年嘅工作岡位，轉左一份好想做而天父又俾機會我做嘅工，雖然或會力有不逮，雖然要從頭再學，雖然有D壓力，但我會努力做好呢份工，好好為病人出一分力，天父求你加能賜力給我吧！我要加油！

這年來，在醫院做義工都遇到好多病友，佢地在治療及等候嘅階段，暫時都好辛苦好難過，有時同佢地分享，原本想為佢地加油，點知有時老公分享嘅經歷卻嚇親佢地，真係對唔住，其實每個病人嘅情況都唔同，可能你地唔會咁辛苦，但係我想講，即使好似老公咁辛苦，大家都唔好放棄，捱過咗就有另一片天。

祝福大家！

Day +1000 千日老公

好耐好耐無update 了, 我和老公一切安好~感謝天父

今日是Day +1000, 還記得Day +100 儀姐夫晚上代主牽庭送來的百日蛋糕...轉眼已過了10個百日....實在感恩.

老公生活如常, 健康ok, 間中像大家一樣會有傷風感冒, 依家每三個月覆診一次.老公肥左又精靈左. 儲肥老公的同時, 我都儲肥左自己, 正式加入肥師奶行列. >_< ^_^.....

10個千日後是 Day +10000 唔知到時仲上唔上到網呢? 哈哈

祝福大家!

DAY +731 ＜老公住院節紀念日＞ - 2 歲了！

今日係咩日子，我差D都唔記得，但係老公就牢記於心，早幾個星期已叫我記得請假。又係嘅，今日係＜老公住院節紀念日＞，亦即係老公接受骨髓移植、從死裡逃生嘅大日子，老公又點會唔記得呢^^

先講一下老公身體嘅情況：哈哈，見個 Blog 咁耐都冇更新，大家咁聰明應該都估到一二。老公11月初去瑪麗醫院覆診，醫生說："你情況穩定，以後可以返東區醫院覆診，冇咩事唔好再見喇！＂，之後再補一句：＂係叻仔先可以唔洗返嚟。＂聽到醫生咁講，我同老公都心中暗喜，離開J8病房，我地都忍唔住笑出嚟...仲暗暗同 J8 講 "BYE BYE" ^^！感謝瑪麗醫院上上下下的醫護人員這些年來的照顧，衷心感謝，盼望後會無期。

明年１月起，我們就重返東區醫院~ Ｗe're Back!

我地嘅生活雖然平淡，但我們很嚮往，返工放工，返教會，做下義工，同朋友家人聚首，在家中閒休，安安穩穩的，很開心，很快樂，很滿足。平淡是福，知足常樂。

兩年了，雖然對老公患病時的日子印象都好模糊，但係有些重要嘅事，一定唔可以忘記。特別是天父如何帶領我們走過死蔭幽谷，人的能力有限，病了不一定可以康復，基督徒也不例外，但係在艱辛的旅程中，能獲得從神而來的平安，卻是最重要的。

＜老公住院節紀念日＞不單是慶祝老公新生命幾多年的生日，還是一個讓我們回顧整個治療過程，數算主恩的日子。重新看回過去自己寫的文章，字裡行間記載著痛苦、擔心、恐懼，但卻又不失喜樂，愛和感謝。我們又點可以不感謝天父呢！

老公，2 歲生日快樂！


紀念日必備－罐頭菠蘿腸



兩週年，乾杯！　（左起順時針：奶奶、老爺、我、老公）