DAY +90 哈哈哈哈！

今天我們一鼓作氣於早上5時跑出暖笠笠的被窩，睡眼惺忪的在刷牙洗面，煮早餐，吃早餐，收拾出門口，為的就是早一步到醫院，早一步簽名，早一步抽血，早一步見醫生，早一步取藥，早一步離開。

當我們6時40分踏入J8病房已經有5個人在等候，啊～～難度他們在醫院紮營？！沒多久，護士把點名紙取出，大家亦好有秩序的按到達的先後次序排隊簽名，點知排第3及第4位的2位女士，竟然一人簽2個名，明顯是幫其他病友簽到。到我替老公簽名時，已排第8位，老公知道之後有一點既唔開心，當然愛和睦的我們也沒有向病友提出指責，只是心中暗感不公。事件充份發揮出病友間既互助精神，但卻為辛辛苦苦一早起身的病友帶來肉體及心靈既創傷。

一早的不愉快心情，隨著香噴噴的咖啡及牛角包慢慢退去，好不容易等到8點半返回病房抽血，抽血一般是按簽到的次序一個跟一個的抽，不知怎的，今天又來一個大混亂，叫完頭５個之後又跳了幾個，跳了十幾個才叫回老公抽血。今天老公要吊藥，不知幹什麼，老公又是包尾的一個...不打緊，早吊遲吊反正都要等驗血報告及醫生到達才可見醫生，所以我們又乖乖的等候。

因為老公吊藥所以今次我地坐在門診等候，那兒真像打仗，三個護士，照顧四十幾個病人，抽血、通喉、打針、吊藥、聽電話、回應病友提問、指導每個病人到不同地方做不同的檢查、招呼醫生、安排覆診、輸血等等等........七手八腳，左轉右轉的勞碌著，她們真的很犀利！

等了又等，打機打到PSP冇電，終於醫生來了，一個又一個的病人入去出黎，終於到我們了，今次有好消息（打左咁多廢話，終於入正題 =P)。

沒有時間看的，請由此開始看：

今天的驗血結果：小白 3.2　小中1.64 小板82 小色 11.3

醫生說有進步，並把一星期要到東區吊的３次藥，改為２次，仲豁免老公下星期一的覆診，YEAH!!! 不過老公的血壓在吃了血壓丸的情況下，仍然大超標，醫生說要多加留意。

見完醫生，聽到護士發出廣播，呼籲病友切勿替別人簽名，因為其中一位由病友代簽名的病友早幾日已入院，根本不應在門診出現，但係有病友為他簽到，令到護士又入了資料，又不斷四出想找那病友抽血，結果整亂了醫院的電腦紀錄，同時又加重了護士的工作。

 等了２小時取藥後，最後我們在下午三時多終於可以離開。好開心下星期唔洗到瑪麗覆診，可以休息下。

哈哈哈哈！！！！

DAY +89 陽光總在風雨後

今日夜晚電視有個［我的2010］既節目，節目最後出左一句字幕＂陽光總在風雨後＂。縱然我們未完全走出風雨，但我感到我們現在已在陽光之中，感謝天父讓我們可以經歷風雨後的陽光，我們知道這不是理所當然的，所以要再之感謝天父。祈望陽光能持續，風雨遠去，很貪心呢！貪心不來，也希望可以藉著這點陽光，讓我們更有力量去面對風雨喇。


聽日係情人節，我們既節目係一起食情人節早餐，之後拍住拖去瑪麗覆診。因為我夜晚要開會，所以同唔到老公食情人節大餐。

有人話呢個係你地結婚之後第一個可以一齊慶祝既情人節，要開會太可惜了吧～當然我也希望訂這天開會的人可以通氣一點（唔知佢會不會看到 =P)，但係已經成定局。而且對我來說只要有老公在身邊日日都是情人節，餐餐飯都係咁開心，所以無特別覺得可惜。但係情人節總特別令人想跟情人一起共晉晚餐既，唔知老公會唔會唔開心哩？老公，對唔住呀！就等老爺奶奶呢對情人來陪你食飯喇。話時話，咁又會唔會破壞左老爺奶奶既情人節呢？我諗老爺奶奶都應該樂意吧～ ^^

祝大家情人節快樂~

DAY +86, 87, 88 忙碌的一週完結

呢個星期大王好忙，星期一、三、五去左東區醫院，星期二去左瑪麗醫院，自骨髓移植之後都沒有那麼頻密的出過街，大王有點攰，不過精神還可以，今天可以在家叉電了。

下星期一返回瑪麗醫院覆診，又是我的COFFE DAY了。

是週平安過渡，恭喜恭喜～

DAY +83, 84, 85 覆診

昨日到瑪麗覆診，驗血結果：小白 2.03 小色 8.3 小板 79 小中 0.89

由於結果沒有明顯進步而且偏低，所以要打一支小白針和輸血2包。另外，鎂較低，要吃鎂丸。醫生說小板幾好，好似升緊。逄星期一，三，五繼續去東區吊藥，下星期一再返瑪麗覆診。暫時繼續觀察。

章魚太：醫生，病人可以出街食飯未呀？
醫生：依家先八十幾日，冇咁快想出街食飯呀，仲要依家豬流感咁勁，小心Ｄ好。
章魚太：係既。
章魚生：-_-

DAY +81, 82 暖笠笠，甜蜜蜜

呢幾日，我同老公就好似有渴睡症咁，只要一瞓上床就即刻會瞓著，食完就瞓，瞓完就食，真係好開心。

老公依然好多胃氣，胃口差，精神也不太好。

昨晚睡之前，回顧過去一年的日子，我地都唔知道我地點可以捱過，如果沒有天父，沒有信仰，我們會捱得住嗎？來到今天，真的要再次感謝天父，感謝天父給我們身邊安排這麼多天使。

DAY +80 大蜜蜂來拜年

WAKAKA~ 今日是第８０日了，恭喜恭喜！

一早同老公一齊去醫院，新年街都小人D，路面十分暢順，醫院亦很寂靜，沒有好多人在大堂等拎藥，冷清清的。病房人也不多，見到都好開心，因為冇咩人要留在醫院過年。

老公近來個胃唔係好舒服，胃氣很多，餐餐都食唔落野，食一半倒一半，皮膚有D疹，上次醫生話再觀察下，睇下會唔會係排斥。下星期二才到瑪麗覆診，希望醫生可以了解一下，查出老公出左咩問題喇。

今日有一隻好特別既嘉賓黎左我屋企拜年。話說我同老公都好怕蛇蟲，特別係識飛既昆蟲，黎個亦都係我地住到40樓既原因，諗住D昆蟲飛唔到咁高。點知今日發現我地太天真了，下午來了一隻超大隻既蜜蜂，係我地平時去郊野公園見到個身有幾截，飛到嗡嗡聲的那種。佢唔知向邊飛左入屋，之後就入左房，老公當時瞓緊覺，俾我Ｄ尖叫聲嘈醒就發現有隻大昆蟲向佢頭頂飛黎飛去，老公躲在被窩，趁蜜蜂飛開左，就衝出廳。

我相信好多人也有類似既經驗，又怕昆蟲，又怕唔知佢飛左去邊。由於房的窗是沒有開的，所以佢一定是在房，我地過左一陣，為左今晚布覺好瞓，所以鼓起勇氣，用毛巾包住個頭入房看看大蜜蜂去左邊，點知佢唔見左WOO....我地又擔心佢飛左入衣櫃，又擔心佢匿向被窩。於是我地用左一支好長既鉗慢慢張床邊的衫，一件件夾出黎，一直都唔見佢，於是又夾埋Ｄ被出黎，都唔見佢。如是者攪左一輪都見唔到佢既蹤影，老公說不如當佢走左喇 -_-....雖然安慰自已佢走左，但係心知佢明明一定仲向房....所以間唔時都望下間房。皇天不負有心人，終於在一段時間之後，又見到佢喇。

呢次我地唔怕佢喇，用盡一切方法趕佢去隻窗到，在一輪尖叫同進攻之下，佢終於飛走左LU...

大家係唔係覺得我好無聊呢，諗返都幾無聊，仲要向度打幾百字記錄低，哈哈...多謝大家咁有心機睇到呢度。能夠跟老公一起趕蜜蜂，係一件好開心既事，好開心啊～

DAY +79 新年進步

今年年初一可以同老公一起過年很開心。雖然今年我們不會出去拜年，又不會招呼朋友來我家拜年，但係２個人在家靜靜的一起過幾天的假期，感覺真好。

明早去醫院吊藥，因為日間病房明天公眾假期唔開，所以要入院，應該可以即日走的。

新年快樂～