了解骨髓移植

骨髓移植同移植器官唔同，唔洗開刀，又唔係相約捐贈者同時入手術室，做個手術便可以，雖然唔洗開刀，但絕對是一個漫長艱辛的過程。


之前家庭會議，醫生表示老公做骨髓移植的康復機會率是40-50%，骨髓移植後復發機率是50%，骨髓移植期間死亡機會率是20-30%

整個骨髓移植如一切順利，按一般的情況，需時約1.5-2個月，以下是依我理解老公治療的流程：

1. 入院後，先打幾支脊髓針，用來保護脊髓，防止被之後重劑量的化療藥破壞脊髓。
2. 食4日口服化療藥，每日4次，每次25粒，即係要每天吞100粒像尾指頭大小的藥。
3. 打3日重劑量針化療，務求將本身體內的骨髓細胞全部打死（同時好的細胞也一併死去），這個時候，身體將會變得十分虛弱，抵抗力亦會近乎0, 受感染的機會很高。
4. 休息一日
5. 抽取捐贈者身上的血幹細胞,並像輸血般輸入老公身體
6. 之後的14日左右，新的細胞同舊的細胞就會互相打仗，不同程度的排斥會出現
7. 如新的細胞順利爭勝了，好的細胞便會開始在體內生長
8. 各個指數慢慢提升，期間一些較慢的排斥情況開始會發生
9.丕常一般14日白血球會生長到一定的水平。
10.情況許可，便可離開隔離病房，再觀察，如情況穩定可回家隔離

移植後等待各血指數上升的情況就好像之前每次化療後等各指數上升一樣，但這次除了高感染機會外，會加上排斥情況，所以在血指數超低的時候，情況會很危殆，之前出現過的流血不止、持續高燒、嚴重敏感出紅疹、嘔吐、食之不得下嚥、含膿傷口等悲慘的情況很有可能會出現，所以絕對是一個漫長艱辛的過程。

如果你是基督徒，我冒眛邀請你在禱告中記念老公的需要。

與東區醫護說再見

今天一早，我們返回東區醫院打針，務求在進行骨髓移植前谷起老公血的指數。

返到去D4病房，熟識的嬸嬸一如以往跟我們打招呼：＂章魚回來覆診呀？＂

這兒的醫護同工都認得我們了，回去感覺很親切。

每次病房都會有好多既病人，但係每次姑娘都會好快為老公服務，今次沈姑娘也不例外，很快已經幫老公打＂小白針＂（呢個係我地幫白血球激生針起既名）。沈姑娘告訴我們，昨天他們收到瑪麗的消息也為我們緊張，不斷查看電腦看看有骨髓報告未，當他們收到瑪麗醫院的通知時，他們也很開心興奮。

沈姑娘叮囑了我地明天到瑪麗的注意事項，叫我們要小心Ｄ，加油！感覺很窩心呢。沈姑娘仲特別安排我地見一下負責老公的靚仔醫生劉醫生。劉醫生見到我地都露出好開心的表情，仲話呢次真係感謝主，之前見到老公的情況，佢都唔知點同我地講好，依家終於有機會喇。在百忙中，劉醫生同沈姑娘都好開心咁同我地傾計，仲應我們的要求同我地合照呢，真係好開心呀，我地仲約好左，等老公好返再返去探佢地。

臨離開東區醫院前，我地都好掛念在老公化療住院期間常給予老公鼓勵既馮姑娘，當我地話佢知可以去換骨髓了，佢都好開心，我地問走之前可唔可以見下你呀，佢即係話梗係可以喇，我地上到5樓，馮姑娘已經在電梯口等緊我地喇，一見到老公，即刻跟他擁抱，我覺得佢地唔止係護士同病人既關係，而係天南地北無所不談的好朋友。

老公之前在醫院受苦的時候，因探病時間既限制，我同其他親人朋友都唔可以成日陪住佢，在佢寂寞無助既時候，好彩有馮姑娘、院牧、劉醫生等醫護額外用自己既時間去探佢，安慰佢，唔係老公在隔離病房的日子將會更慘，多謝你地這群有愛心既醫護，感謝神為老公安排咁好既天使。

大戰，一觸即發

自昨日收到瑪麗醫院的來電，一直都很緊張，今天總算可以鬆一口氣，暫時過左一個關口。
 昨日瑪麗醫院通知，骨髓捐贈者已準備就緒，只要老公的情況OK，最快星期六就可以入院，仲約了今天一早到醫院驗骨髓。

今日一早便跟老公一起到醫院，去到J8病房，人山人海，好多人在等候覆診，心諗原來血癌已經係一個好普遍既病。

好快護士已經幫老公抽血，冇幾耐就有個女醫生幫老公抽骨髓，老公話今次是有史以來最痛的一次，休息了半小時，就去見另一個醫生，醫生問左Ｄ問題，就叫我地出去等，一切要等骨髓報告才可定案。

等待等待.....心中其實打定輸數，老公成6個月冇打化療，之前D血指數又大起大落，Ｄ骨髓實好差。我仲同老公講，如果今次過得到，一定係神蹟。


等到5點..都未有消息，實在折磨，於是我地決定走喇。一上的士，就收到電話，是護士打來，竟然說冇問題！明天去打支激生針，星期六就可以入院了。


我地聽到都好開心，之後就忙住通知大家，開心過後，我地都突然感到好疲倦，可能之前太緊張了。


感謝主成就這件不可能的事。


現在是另一個關卡的開始，未來的路仍然很漫長，實在要靠大家多多支持及禱告。